A Mesa pola Normalización Lingüística solicitou formalmente a todas as deputadas e deputados galegos no Congreso español que empreguen o galego en todas as súas intervencións.
Nunha carta remitida aos deputados e deputadas das Cortes elixidas polas catro circunscricións galegas e asinada polo seu presidente, Marcos Maceira Eiras, a entidade considera que sería “un primeiro paso esencial para pór fin a todas a barreiras ao galego na Administración e poderes do Estado” español.
Esta é a carta enviada hoxe a cada deputad@ galeg@ no @Congreso_Es #ÉHoraDoGalego #ÉHoraDasLinguas#QueremosGalego#Quesevexaogalego pic.twitter.com/FWwd7nhJxG
— A Mesa Normalización Lingüística (@amesanl) August 18, 2023![Publicidade 196064]()
Fin do veto
Esta demanda da Mesa encádrase no anuncio feito pola presidenta da Cámara baixa, a socialista Francina Armengol, que esta quinta feira anunciaba que levantaría o veto ao galego, catalán e euskera no Congreso.
“Temos a oportunidade de mostrar a nosa gran riqueza e por iso, quero anunciarlles que esta Presidencia permitirá a utilización de galego, catalán e euskera a partir desta sesión constitutiva”, manifestou Armengol.
Non obstante, un día despois, esta mesma sexta feira, Armengol recoñeceu que implantar o uso de galego, catalán e euskera “ten as súas complexidades” en canto a medios e dixo que estudará as “posibilidades técnicas” coas que conta o Congreso, afirmando tamén que o obxectivo é que estas linguas poidan utilizarse “o máis rápido posíbel”: “É o meu compromiso”, dixo.
Nesta liña, descartou estabelecer un calendario e enumerar os medios que serían necesarios, após ser preguntada se será posíbel levantar o veto xa nesta lexislatura que acaba de iniciar.
