Dispárase a violencia no Ecuador: "Estamos nun estado de guerra"

Polo menos dez persoas faleceron e tres resultaron feridas durante as últimas horas no Ecuador. O presidente do Goberno ecuatoriano, o neoliberal Daniel Noboa, declarou que o país se atopa "nun estado de guerra" debido á espiral de violencia desencadeada pola actividade de grupos criminais que cualificou como "narcoterroristas". Ademais, un mínimo de 70 persoas resultaron detidas. A mesa de traballo liderada polo alcalde de Guayaquil, Aquiles Álvarez, informou esta cuarta feira de que tamén se rexistrou a toma de cinco hospitais e da canle ecuatoriana TC Televisión por un grupo de encapuchados armados, así como diversos danos en infraestruturas e vehículos. Ademais, as autoridades comunicaron a liberación de tres axentes que foran secuestrados na cidade de Machala, no sur do Ecuador, o que motivou a detención dunha decena de persoas implicadas "nestes actos de terrorismo". Tamén detiveron 12 supostos responsábeis de feitos violentos en Esmeraldas (norte), aos que se lles requisaron cócteis molotov e vehículos roubados. Á súa vez, a Policía aseverou que desarticulou unha organización "terrorista" en Ambato (centro), nunha operación que se saldou con 17 persoas arrestadas, entre elas tres prófugas, e varios vehículos e armas incautadas. Así mesmo, tamén arrestaron nos Ríos (centro) sete "suxeitos vinculados ao secuestro de servidores policiais e feitos terroristas con explosivos". Ecuador declara o "conflito armado interno" nunha noite de violencia que deixa polo menos 10 mortes Pola súa parte, a Fiscalía ecuatoriana informou de que procesarán 13 persoas polo delito de terrorismo por ter ingresado armados nas instalacións de TC Televisión e ter retido o persoal do medio de comunicación. O Ministerio Público tamén formulou cargos por delito de evasión contra un total de 17 presos que fuxiron do Centro de Privación de Liberdade de Riobamba e que volveron ser capturados nas últimas horas. Descontrol nos cárceres Se a situación é preocupante nas rúas, o descontrol nos cárceres non é menor. Os motíns sucedéronse despois de que se coñecera a fuga de José Adolfo Macías Villamar, alias 'Fito', líder da banda criminal 'Los Choneros' e que foi vinculado ao mexicano Cartel de Sinaloa. A el sumouse Fabricio Colón Pico, líder dunha célula do grupo delitivo 'Los Lobos', que foi capturado a finais da pasada semana e escapou da prisión apenas tres días despois. Este home foi acusado pola fiscal xeral do Ecuador, Diana Salazar, de estar detrás dun plan para atentar contra ela e a súa familia. Nun contexto marcado polos motíns nas cadeas ecuatorianas, o Servizo Nacional de Atención Integral a Persoas Adultas Privadas da Liberdade e a Adolescentes Infractores (SNAI) sinalou que foron liberados 11 funcionarios que estaban retidos en tres cárceres e que traballan na liberación doutros 125 carcereiros e 14 administrativos que se atopan secuestrados en cinco centros penitenciarios distintos. A violencia intensifícase no Ecuador: Noboa declara o estado de excepción e varios encapuchados toman unha canle de televisión Decreto de Noboa No medio de toda a axitación, Noboa emitiu un novo decreto que modifica o anteriormente aprobado e no que se recoñece que no Estado existe un "conflito armado interno". Mediante a nova norma, o presidente identifica varios grupos do crime organizado transnacional como "organizacións terroristas e actores non estatais belixerantes". Estes grupos sinalados son 'Águilas', 'ÁguilasKiller', 'AK47', 'Caballeros Oscuros', 'ChoneKiller', 'Los Choneros', 'Corvicheros', 'Cuartel de las Feas', 'Cubanos', 'Fatales', 'Gánster', 'Kater Piler', 'Lagartos', 'Latin Kings', 'Lobos', 'Los p.27', 'Los Tiburones', 'Mafia 18', 'Mafia Trébol', 'Patrones', 'R7' e 'Tiguerones'. "Ordenei ás Forzas Armadas executar operacións militares para neutralizar estes grupos", afirmou Noboa. Posteriormente, o secretario xeral de Comunicación da Presidencia, Roberto Izurieta, notificou que se instalou o Consello de Seguridade Pública e do Estado, "para analizar a situación do país". O Comandante das forzas armadas do Ecuador, Jaime Vela, fixou as bandas criminais como "Obxectivo militar" estatal Pola súa parte, o comandante das Forzas Armadas do Ecuador, o almirante Jaime Vela, advertiu de que os grupos armados que aparecen no decreto que declara "a existencia dun conflito armado interno" pola violencia desencadeada serán a partir de agora un "obxectivo militar". Incerteza e novas falsas A situación está a xerar incerteza na poboación. Nas principais cidades aumentou o tráfico de vehículos, de quen busca chegar máis cedo ao seu fogar, así como a procura por abastecerse de alimentos, xerando grandes fileiras nalgúns puntos de venda. Así mesmo, centros comerciais de Quito, Guayaquil, Cuenca e outras cidades ecuatorianas suspenderon a atención ao público. Pola súa parte, o Aeroporto Internacional Mariscal Sucre da capital ecuatoriana anunciou medidas para garantir a seguridade das persoas viaxeiras, do seu cadro de persoal e das instalacións. Ademais, o Ministerio de Educación notificou a suspensión das clases presenciais en todo o Sistema Educativo do Estado até finais desta semana. Ao mesmo tempo, comezaron a circular novas falsas nas redes sociais. Por exemplo, foi publicada unha información sobre persoas secuestradas no Metro de Quito que non era certa. Tamén correu a voz sobre a toma da Universidade de Guayaquil, cando en realidade un grupo de delincuencia si causou problemas mais foi neutralizado. Neste contexto, o Goberno do Perú anunciou a declaración de emerxencia na fronteira con Ecuador, de maneira que as Forzas Armadas apoiarán a Policía no resgardo da zona. O presidente do Consello de Ministros, Alberto Otárola, sinalou que ademais se autorizou un continxente extra de policías "para que fagan un control máis intenso do tránsito das persoas que ingresan" a solo peruano. Numerosos Estados de América Latina e do resto do mundo expresaron a súa solidariedade co Ecuador. Correa chama á unidade nacional O ex presidente ecuatoriano Rafael Correa expresou o seu respaldo a Noboa nesta crise, cun firme chamado á unidade nacional. Ademais, apuntou aos ex mandatarios Lenín Moreno e Guillermo Lasso, aos que sinalou por "permitir a infiltración" das mafias do crime organizado no Estado. Tras lembrar que en 2017, cando deixou o poder, o Ecuador era a segunda nación máis segura da rexión, afirmou que "hoxe somos o quinto máis violento do mundo e temos a líderes do crime organizado que declararon unha guerra ao Estado. Iso era inimaxinábel", sentenciou.