Novos datos confirman a dramática agresión xenocida que sofre o pobo palestino debido á ocupación por parte do Estado sionista de Israel. Nesta ocasión, foi o Comité para os Dereitos da Infancia de Nacións Unidas o que denunciou nun informe que Israel maltrata “sistematicamente a nen@s palestin@s”, a quen somete a “tratamento degradante e torturas, nega o seu dereito á educación e aos coidados médicos e @s emprega como escudos humanos e converte en obxectivos indiscriminados das súas accións bélicas, o que derivou na morte de centos de menores”.
O informe sinala que na última década uns 7.000 nen@s palestinos de entre 9 e 17 anos, foron arrestad@s, interrogad@s e detid@s
Israel, en resposta, remitiu a unha réplica oficial restando importancia ao documento ao dicir que “ten motivacións políticas”, escusa habitual por parte do seu Goberno.
O informe, redactado por 18 expertos, sinala que na última década uns 7.000 nen@s palestinos de entre 9 e 17 anos, foron arrestad@s, interrogad@s e detid@s. Durante o período de detención, “son sometidos a tratamentos degradantes, e en ocasións a torturas”, apunta o documento. “Son interrogados en hebreo, unha lingua que non comprenden e asinan confesións nese idioma para conseguir a súa liberación”, engade. A maioría das crianzas detidas son acusadas de guindar pedras ás forzas de seguridade israelís, un delito penado con até vinte anos de cárcere.
O drama non só se reflete nas torturas e detencións, tamén nos asasinatos. Segundo o informe da ONU, “centos de nen@s morreron e miles resultaron ferid@s nos últimos dez anos como resultado de operacións militares de Israel, especialmente na Franxa de Gaza”.
