A UE poderíase ver forzada a elixir entre a China e os EUA como principal aliado na escena mundial no medio de cambios xeopolíticos. É a opinión do xefe da diplomacia comunitaria, Josep Borrell.
"As análises levan tempo a falar da fin dun sistema liderado polos EUA e a chegada do século asiático. Isto está a acontecer agora diante dos nosos ollos", afirmou, e engadiu que "a presión para elixir bandos vai en aumento".
O Alto Representante para Política Exterior fixo estas declaracións durante a conferencia anual de embaixadores alemáns. Borrell avogou por se manter á marxe da pugna entre a China e os EUA, e apostou por que a UE marque unha axenda de seu na nova orde mundial que xorda tras a pandemia, sen ser "instrumentalizada" por Beijing ou Washington. É dicir, o que na xerga comunitaria se coñece como "autonomía estratéxica".
"Como UE, debemos seguir os nosos intereses e valores e evitar ser instrumentalizados por un ou outro", manifestou.
Borrell cre que a cooperación multilateral será "máis necesaria que nunca". "Esta é a primeira crise en décadas en que os EUA non están a liderar a resposta internacional", apuntou, e lamentou que o enfrontamento fricciones entre ambas as potencias leve a unha "parálise" en institucións como o Consello de Seguridade da ONU, o G20 ou a OMS.
Relación UE-China
Segundo a súa opinión, a China está a gañar máis poder e respecto no escenario mundial, mais o seu papel como potencia global suscita tamén "dúbidas e medos". As relacións entre Bruxelas e Beijing deben basearse na "confianza, transparencia e reciprocidade", algo que non sempre sucede así, admitiu Borrell, falando de cara á conferencia UE-China prevista para outono en Leipzig (Alemaña).
