O primeiro ministro do Reino Unido, Rishi Sunak, apuntou á "segunda metade do ano" para a futura convocatoria das eleccións parlamentarias, pese a que desde os partidos da oposición lle reclaman que adiante a cita para que teña lugar antes incluso do verán.
"A miña hipótese de traballo é que teremos eleccións xerais na segunda metade do ano", dixo Sunak, despois de que nas últimas semanas se dispararan os rumores sobre a potencial convocatoria de comicios no mes de maio. A data límite é xaneiro de 2025, polo que o primeiro ministro ten unha marxe de doce meses.
Sunak, que falou ante os medios durante un acto oficial en Mansfield (Inglaterra), non descartou explicitamente a data de maio, pero si insistiu en que quere seguir desenvolvendo as súas políticas en cuestións "chave" como economía ou inmigración, dous dos temas que previsibelmente marcarán a próxima campaña.
Os conservadores teñen actualmente a maioría absoluta na Cámara dos comúns, grazas á cal puideron sortear a dimisión de até dous primeiros ministros sen pasar polas urnas e sacar adiante leis sen ningún tipo de apoio externo –e incluso coa discrepancia de parte da bancada 'tory'–.
Sondaxes
Non obstante, nas sondaxes vaticinan unha derrota do Partido Conservador, que figuraba cunha intención de voto do 22% nunha enquisa realizada a finais de novembro pola firma YouGov. Os laboristas, en cambio, consolídanse como favoritos, cun dato que ronda o 43%, se ben as especiais características do sistema electoral británico, con circunscricións uninominais, limitan calquera posíbel extrapolación directa en escanos.
