Siria denuncia que Israel realizou un ataque aéreo aos aeroportos de Damasco e Alepo

Siria denunciou esta quinta feira ataques de Israel contra os aeroportos das cidades de Damasco e Alepo. Segundo manifestou o Ministerio de Defensa sirio, o Estado israelita "levou a cabo de maneira simultánea unha agresión aérea con refachos de mísiles, o que provocou danos nas pistas de aterraxe" dos mencionados aeródromos "e deixounos fóra de servizo". O departamento sirio afirmou que se trata dun "intento desesperado do inimigo israelita" de desviar a atención dos "crimes" que está a cometer en Gaza. Os ataques de Israel a Siria son algo habitual, mais gañan importancia no contexto dunha eventual escalada do conflito desde Palestina cara a outras frontes. A ofensiva non provocou vítimas mortais, mais si danos. A sobrepoboación de Gaza ou como meter dous millóns de persoas en Vilalba Na fronte principal, a cifra de falecementos neste conflito xa supera 2.700. Na Faixa de Gaza o número de persoas mortas aumentou até 1.417, das cales 447 son crianzas, segundo o último balance do Ministerio de Sanidade de Palestina, mentres que os pasamentos na parte israelita xa son máis de 1.300. Ademais, as persoas desprazadas dos seus fogares como resultado dos ataques contra a Faixa de Gaza alcanzan as 338.000. Traballadores deportados Segundo puido saber Nós Diario a partir de fontes no territorio, miles de traballadores de Gaza viron cancelados os seus permisos de traballo en Israel, de onde foron expulsados, mais sen tampouco poder volver ás súas casas, polo que agora mesmo se atopan en territorio cisxordano. Waleed Saleh, profesor experto en mundo árabe: "Israel quere que haxa refuxiados e así botar os palestinos da súa terra" Non sendo posíbel estabelecer unha cifra de traballadores deportados, as fontes ás que accedeu este xornal exemplifican a situación a través do caso da cidade de Ramallah, onde máis de 2.000 traballadores, sobre todo da construción, están a ser acollidos en dous polideportivos. A poboación local, así como organizacións humanitarias, están asistindo a estes traballadores, dotándoos de medicamentos, roupa e alimentos, así como de outras necesidades básicas. "Foi desolador ver unha ringleira de homes maiores agardando por un colchón", comentou a Nós Diario unha das cooperantes. Ademais, a situación en Cisxordania, aínda que lonxe de ser tan grave como na Faixa de Gaza, tamén é de moita tensión. Dous palestinos morreron esta quinta feira nun tiroteo perpetrado por colonos israelitas contra os asistentes a un funeral na localidade de Qusra, ao sur de Nablús. As vítimas foron un pai e un fillo que acudían ao funeral de tres palestinos que morreron antonte, tamén nun tiroteo por parte de colonos israelitas nun funeral. O asedio de Israel deixa Gaza sen luz ante o inminente ataque militar de forzas terrestres Ademais, un mozo de 16 anos faleceu onte tras resultar ferido antonte de gravidade no peito por disparos das forzas de seguridade de Israel no municipio de Bani Naim, ao leste de Hebrón. En total, desde o sábado rexistráronse 29 persoas mortas e 150 feridas a mans das forzas israelitas en Cisxordania. As autoridades palestinas consideraron que estes ataques forman parte "dunha guerra aberta contra os civís palestinos e as súas terras, propiedades e vidas". A opinión pública de Israel culpa Benjamin Netanyahu Catro de cada cinco israelitas consideran que o Goberno liderado por Benjamin Netanyahu é o responsábel da ofensiva desenvolta o pasado sábado polo Movemento de Resistencia Islámica (Hamás) contra Israel. Segundo unha enquisa do Centro de Diálogo, 86% das persoas israelitas, incluídas 79% das partidarias da coalición de Goberno, afirmaron que a incursión supón un fracaso para o Executivo. Ademais, 94% consideran que o equipo de Netanyahu é responsábel da "falta de seguridade" e 56% entenden que o primeiro ministro debería dimitir unha vez remate o conflito. A maioría dixo, por outra parte, que non confía no Goberno nin no ministro de Defensa, Yoav Gallant, para dirixir a guerra. Mentres tanto, o alcalde da cidade israelita de Sderot, Alon Davidi, pediu esta quinta feira a Netanyahu que evacúe todas as persoas residentes da localidade para "facilitar os labores" do Exército tras o último lanzamento de foguetes desde a Faixa de Gaza. "Explora connosco a realidade da guerra!": esta é a polémica empresa que ofrece visitas guiadas a Gaza "Todos os residentes deben ser evacuados de Sderot para que o noso Exército poida levar a cabo con seguridade as súas misións de combate. A xente leva 20 anos aquí, merece ser evacuada", dixo o alcalde de Sderot. "Acusacións infundadas" A Casa Branca negou que o presidente dos Estados Unidos de América, Joe Biden, teña visto imaxes de crianzas decapitadas por Hamás en Israel, despois de que o mandatario fixera unha afirmación nese sentido. Segundo fontes do Executivo estadounidense, Biden referíase á existencia de informes israelitas. Pola súa parte, Hamás condenou "as acusacións infundadas". "Promoveron de maneira falsa e difamatoria acusacións de que membros da resistencia palestina decapitaron crianzas e agrediron mulleres, sen ningunha evidencia que respalde as súas mentiras e afirmacións", sentenciou a organización sobre isto. Blinken visita a zona O secretario de Estado dos EUA, Antony Blinken, garantiulle o apoio a Israel durante un encontro con Netanyahu, no marco da súa visita á zona. "Mentres os Estados Unidos existan, Israel non terá que defenderse só", dixo. A resposta 'viral' dun embaixador de Palestina sobre Hamás na 'BBC': "Vostede pregunta aos israelitas se condenan os seus crimes?" O presidente da Autoridade Palestina, Mahmud Abbas, reunirase hoxe en Amán (Xordania) con Blinken para falar do conflito, informou o secretario xeral do Comité Executivo da Organización para a Liberación de Palestina (OLP), Hussein al Sheij, que sinalou que esta entrevista é "parte do esforzo realizado as 24 horas do día polos dirixentes palestinos [de Cisxordania] para deter esta guerra devastadora". "Destruílos até a medula" O xefe do Estado Maior das Forzas de Defensa de Israel (FDI), o tenente xeral Herzi Halevi, afirmou esta quinta feira que Gaza "non volverá ser igual". Máis dura foi a ministra dos Dereitos da Muller, May Golan, que sentenciou que “algunhas almas fráxiles e 'santurronas' están explicando que a maioría dos residentes de Gaza son poboación civil non implicada, polo que non debemos facerlles dano. Nada diso. Temos que destruílos até a medula”. Malia estes discursos, o bombardeo de infraestruturas civís e o asedio da Faixa de Garza, a Comisión Europea evitou condenar a ofensiva de Israel.