O presidente do Goberno do Estado, Pedro Sánchez, prometeu apoiar a Ucraína "o tempo que faga falta" e "sen importar o prezo que haxa que pagar" para que o país volva ser "libre" e capaz de decidir o seu "propio destino como membro da familia europea".
Ademais deu o seu apoio a que o país entre na UE e a potenciar a participación política de Ucraína a través da creación dun Consello OTAN-Ucraína.
Así o expresou nun discurso ante o plenario do Parlamento ucraíno durante a primeira xornada da Presidencia española do Consello da Unión Europea, onde defendeu que só Ucraína pode fixar "os termos e os tempos das negociacións de paz".
Máis axuda militar
Nunha rolda de prensa xunto ao presidente ucraíno, Volodimir Zelenski, tras unha reunión no palacio presidencial en Kíiv, Sánchez anunciou que o Estado español enviará a Ucraína máis "material militar pesado", incluíndo catro tanques Leopard e vehículos blindados de transporte de tropas.
Ademais, informou de que España entregará a Ucraína un hospital de campaña con capacidades cirúrxicas que "debería mellorar a capacidade" do país "para curar aos feridos preto da fronte".
Pedro Sánchez destacou que España proporcionou atención médica nos últimos meses a 650 cidadáns ucraínos en España e resaltou a formación en Zaragoza de médico ucraínos "a nivel de técnicas modernas". Segundo aseverou, máis especialistas ucraínos chegarán a España para recibir estas formacións durante tres semanas.
O presidente do Goberno lembrou o seu anuncio de 55 millóns de euros para a reconstrución de Ucraína e indicou tamén que os territorios do Estado seguirán a recibir "máis de 180.000 desprazados ucraínos" até que o país "poida gozar dunha paz xusta" que lles permita volver.
Entrada na UE
Na súa visita a Ucraína no primeiro día da presidencia española do Consello da UE Sánchez garantiu o "compromiso político claro e inequívoco" das institucións comunitarias para que o país se converta en Estado membro.
Segundo indicou, ten que "gardar certa neutralidade a respecto diso", mais precisou que as informacións que emitiu a Comisión Europea é de "recoñecemento ás reformas" que está a facer o Goberno de Zelenski: "O informe é positivo e mostra un progreso significativo".
Críticas de Feixoo
O presidente do PP, Alberto Núñez Feixoo, declarou este sábado a súa "lealdade e compromiso" para que este semestre no que a presidencia do Consello da Unión Europea (UE) recae sobre España sexa un "éxito de país".
Toda mi lealtad y compromiso para que este semestre de la Presidencia española del Consejo de la UE sea un éxito de país.
— Alberto Núñez Feijóo (@NunezFeijoo) July 1, 2023
Europa es un proyecto que nos involucra a todos.
Con todo, contrapuxo o rexeitamento de Podemos ao gasto militar e o feito de que o Sánchez, iniciase a Presidencia do Consello da UE prometendo apoio a Ucraína: "Comprenderán vostedes que aos españois tómannos de broma na UE".
"Non é capaz de facer calar ao seu Goberno, polo menos mentres el fala. Sería o mínimo que podemos esixir", engadiu este sábado en Gimenells (Lleida) durante un acto do PP sobre agricultura e gandería.
