As Forzas Armadas de Rusia lanzaron unha serie de bombardeos na madrugada desta quinta feira contra 10 rexións ucraínas, que para o Ministerio de Defensa de Moscova constituíron unha "represalia" pola incursión dun grupo armado desde Ucraína que provocou a morte de dúas persoas na provincia rusa de Briansk a semana pasada, que foi definido polo presidente Vladimir Putin como un "acto terrorista" e cuxa responsabilidade nega Kíiv.
O Ministerio salientou que derribaron instalacións militares ucraínas, empresas de Defensa, complexos industriais vinculados e instalacións enerxéticas que os alimentan.
Ao tempo, as autoridades ucraínas denuncian que 11 persoas faleceron en distintos puntos do país polos ataques. Nese sentido, sinalaron que en Khárkiv foise a electricidade e as subministracións de auga e calefacción.
Asemade, Transnistria divulgou que freou un ataque terrorista contra altos cargos preparado polos servizos secretos ucraínos, que incrementa a tensión na zona no contexto das acusacións entre Moldova -que non acepta a independencia de Transnistria e culpa Moscova de usala para desestabilizar o Goberno pro occidental- e Rusia -que sinala cara a Chisinau por tratar de apoiarse en Kíiv para acabar coas reivindicacións independentistas-.
No que atinxe aos atentados contra os gasodutos Nord Stream, que unen Rusia con Alemaña, máis medios estadounidenses reiteraron a teoría de que unha empresa privada ucraína é responsábel -desvinculando Washington do ataque-, á vez, Moscova insiste en que é "difícil de crer" que ningún Estado estea detrás. Arredor deste asunto, o presidente polaco, Andrzej Duda, afirmou que a destrución dos gasodutos é "rendíbel para Europa".
Aliás, Rusia e a ONU citáronse para na segunda feira negociar a prórroga do acordo para exportar cereais desde Ucraína.
