Portugal impón unha cota de 30% de música autóctona nas radios

A iniciativa tivo unha acollida positiva por parte do sector cultural luso.
Graça Fonseca, ministra de Cultura de Portugal (Foto: Governo de Portugal).
photo_camera Graça Fonseca, ministra de Cultura de Portugal (Foto: Governo de Portugal).

O Ministerio da Cultura de Portugal imporá ás emisoras de radio do país unha cota de 30% de música producida por artistas portuguesas e portugueses.

A cifra anterior, actualizada por última vez en 2009, era de 25%. Con esta medida, o Goberno luso pretende impulsar "un sector particularmente afectado polas limitacións dos espetáculos ao vivo, e agora novamente debido ao cancelamento e adiamento de espetáculos".

"Queremos incrementar a divulgación da música nacional nas radios e contribuír á súa valorización en beneficio dos artistas", asegurou a responsábel de Cultura, Graça Fonseca.

Boa acollida da proposta

Tamén apoiou a iniciativa o presidente da Associação Fonográfica Portuguesa (AFP), João Teixeira: "É manifesto o interese crecente dos portugueses pola música de artistas e autores nacionais, polo que ten sentido, sobre todo no momento de profunda crise no sector cultural en que nos atopamos, que as radios intensifiquen o uso da 'nosa' música".

"Só podemos lamentar que os operadores de radio non o tivesen feito voluntariamente", engadiu.

Pola súa banda, Miguel Carretas, director xeral da Associação para a Gestão e Distribuição de Direitos (Audiogest), considerou que esta medida "traerá tamén un impacto positivo direto na distribución de dereitos a produtores musicais nacionais, unha distribución que sofrerá, inevitabelmente, unha enorme quebra provocada directamente polo confinamento e a diminución das actividades económicas".

A INFORMACIÓN GALEGA ESTÁ NA TÚA MAN!

Subscríbete ao noso boletín de novas.

Date de alta de balde e recibirás unha selección dos nosos artigos para saberes o que acontece.

comentarios