Putin suspende a participación rusa no pacto para reducir as armas nucleares

Na súa intervención anual diante da Asemblea Federal (o órgano lexislativo bicameral), atrasada ao final de 2022, o presidente de Rusia, Vladimir Putin, anunciou a suspensión da participación do país no Tratado de Redución de Armas Estratéxicas, coñecido como Novo Start ou Start III polas súas siglas en inglés. Ademais, denunciou que “sabemos con certeza” que os Estados Unidos (EUA) programan probar novos tipos de armas nucleares, polo que instou o Ministerio de Defensa e a Axencia de enerxía atómica rusa, Rosatom, a “garantir a disposición de probar armas nucleares rusas. Por suposto non imos facelo primeiro, mais se os EUA realizan unha proba nós tamén o faremos”. O mandatario pediu antes de volver á mesa de debate deste asunto “entender que reclaman os países da Organización do Tratado do Atlántico Norte (OTAN) e como imos contabilizar os seus arsenais estratéxicos, é dicir, o potencial total de ataque da alianza”. Nese sentido, definiu como “un teatro do absurdo” que países “involucrados directamente nos intentos do réxime de Kíiv de atacar as bases da nosa aviación estratéxica” agora queiran facer “inspeccións ás nosas instalacións de Defensa”, en referencia á solicitude da OTAN a comezos de febreiro de retomar a implementación das cláusulas do tratado após afirmar que Moscova non o estaba a cumprir, o que considerou un intento “de seguir desenvolvendo o seu armamento mentres insisten en ter acceso ao ruso”. Por parte da alianza militar liderada polos EUA, o seu secretario xeral, Jens Stoltenberg, requiriu a Rusia que reconsidere a decisión e sinalou que con esta medida “toda a arquitectura de control de armas foi desmantelada”. Ao tempo, responsabilizou Rusia de “violar e saír de acordos chave sobre o control de armas” nos últimos anos, poñendo como exemplo a súa saída do Tratado de Forzas Nucleares de Alcance Intermedio. Aínda así, malia o dito por Stoltenberg, non foi Rusia senón os EUA os que anunciaron en 2018 a ruptura do tratado, un dos principais acordos internacionais referentes ao armamento nuclear, durante o Executivo de Donald Trump entre 2017 e 2021. Nese mesmo mandato Washington tamén saíu doutro pacto chave do esquema de seguridade internacional, o Tratado de Ceos Abertos, que permitía controlar movementos militares e de armas por medio da observación aérea mutua. O Start III fora asinado en 2010 entre os EUA e Rusia após rematar o Start I e Start II, e recibiu unha prórroga de cinco anos en 2021 pactada polos dous países mentres se negociaba un novo tratado. O pacto daba 10 anos para acometer unha diminución do arsenal nuclear que deixase como moito 1.550 oxivas despregadas por país, 700 bombardeiros nucleares despregados e 800 plataformas de lanzamento entre despregadas e non despregadas. O último informe ao respecto do Instituto Internacional de Estudos para a Paz de Estocolmo indica que Washington ten 1.744 cabezas nucleares despregadas, por 1.588 de Moscova, porén, se temos en conta as armas almacenadas os arsenais rusos suman 5.977 oxivas por 5.428 dos estadounidenses. Os outros países que contan con este armamento son a China (350 oxivas), Francia (290), Reino Unido (225), Paquistán (165), a India (160), Israel (90) e Corea do Norte (20). A institución sinalou que as cifras concordan coas exixencias do Start III, mais xa alertara dun risco “elevado” de aumento do número de armas nucleares nesta década, unha opción que gaña en probabilidade sen instrumentos de control internacional. Putin culpa Occidente “Quero insistir nisto, eles [Occidente] son os culpábeis da invasión e nós estamos tratando de detela”, defendeu Putin na súa intervención, incidindo en que “fixemos todo o posíbel para resolvelo, mantivemos pacientemente negociacións para unha solución pacífica a este grave conflito, pero ás nosas costas preparaban outro escenario”, en alusión ás declaracións de líderes da Unión Europea como a ex chanceler alemá Angela Merkel (2005-2021) nas que recoñecía que o Acordo de Minsk, asinado para pór fin ao conflito, foi aproveitado para armar Ucraína, polo que non tiñan intención de cumprilo. O presidente ruso cuestionou a expansión da OTAN en contra das promesas previas e fixo fincapé en que a operación militar foi lanzada “para protexer a poboación das nosas terras históricas, garantir a seguridade do noso país e eliminar a ameaza do réxime neonazi de Kíiv”, indicando que “nós protexemos a nosa casa, mentres que o obxectivo de Occidente é o poder ilimitado”. Asemade, alertou de que após “Occidente abrir o camiño aos nazis en Alemaña”, nestes intres “están a reconverter ese proxecto en Ucraína” despois de impulsar guerras con milleiros de vítimas e millóns de refuxiados “aos que non presta atención; están roubando, falando de democracia e queren impor os seus valores totalitarios”. Nesta liña, apuntou que “Rusia non está en guerra co pobo ucraíno”, ao que considerou refén do seu Goberno e “dos amos occidentais que ocuparon o país”, aos que censurou por acabar coa orde internacional xurdida da Segunda Guerra Mundial en beneficio dos “intereses egoístas dos Estados Unidos”, aos que implicou nos esforzos “por levar o conflito a unha dimensión global”. Axuda a Kíiv O Kiel Institute publicou onte o último reporte da axuda comprometida a Ucraína desde a invasión rusa o 24 de febreiro de 2022, no que desvela que até o 15 de xaneiro deste ano prometeran a Kíiv 157.000 millóns de euros, a inmensa maioría provinte da OTAN. Dese total, 80.000 millóns corresponden a asistencia financeira, 65.000 millóns a envíos militares e os 12.000 millóns restantes a axuda humanitaria. Iso si, o organismo apunta que dos compromisos financeiros apenas a metade foron desembolsados. Con diferenza, os EUA lideran esta asistencia, con máis de 73.000 millóns de euros, dos que 44.000 millóns se refiren a armamento. O volume de axuda occidental é case equivalente ao valor íntegro do produto interior bruto ucraíno en 2021. Beijing reclama un proceso de paz O ministro de Asuntos Exteriores chinés, Qin Gang, pediu a OTAN que deixe de “alimentar o lume” en Ucraína, alertando da posibilidade de que a guerra se “saia de control”. En paralelo, subliñou que “traballará coa comunidade internacional para promover o diálogo e a consulta, abordar as preocupacións de todas as partes e buscar a seguridade común”, tras publicar Bloomberg que Beijing proporá está semana unha mesa de negociación para alcanzar un alto o fogo en Ucraína.