Putin imponse nuns comicios cuestionados polos EUA e a UE, que vén agora?

Ella Pamfilova, presidenta da Comisión Electoral Central de Rusia, reportou a segunda feira que tras o reconto de máis de 87 millóns de sufraxios, o actual presidente, Vladimir Putin, foi reelixido ao recibir 87,28% dos apoios, moi por diante do candidato do Partido Comunista, Nikolai Kharitonov, con 4,31%, de Vladislav Davankov, de Xente Nova, con 3,85%, e de Leonid Slutski, do Partido Liberal-Demócrata, con 3,2%. Asemade, recalcou que se tratou da participación electoral máis alta da historia do país, que alcanzou 77,44% nunhas eleccións que remataron o domingo tras a apertura das urnas a sexta feira, e nas que foi posíbel emitir a papeleta por internet. Nese sentido, sostivo que detectaron máis de 12 millóns de ciberataques contra a entidade durante as votacións, cualificando a “influencia agresiva” desde o exterior para “perturbar e desacreditar” os comicios como sen precedentes. En paralelo, Putin agradeceu á cidadanía o apoio, incidindo en que “temos por diante moitas tarefas concretas e importantes”, así como en que “os votos dos cidadáns de Rusia conforman a vontade unificada do pobo”. Arredor de Alexei Navalni, considerado por Occidente como o seu principal opositor e que faleceu en febreiro nunha prisión rusa, confirmou que pouco antes do seu deceso trasladou a súa posición favorábel a que fora liberado nun intercambio con outros presos, o que divulgara por primeira vez a contorna de Navalni. No mediodía do domingo, desenvolveuse o principal acto de oposición ás votacións é a Putin, co chamamento opositor a votar por outra candidatura ou anular o sufraxio. A axencia EFE trasladou que a afluencia de votantes “disparouse” a esa hora, e o portal OVD-Info comunicou que 74 persoas foron detidas o domingo en 17 cidades, vinculando a meirande parte dos arrestos coa acción opositora. Putin seguirá no poder con máis de 77% de participación e máis de 87% dos votos “Si que creo que Putin gañou as eleccións pero esta porcentaxe non é real”, explica en declaracións a Nós Diario Abel Riu, politólogo especializado no espazo ex soviético e co fundador do Catalonia Global Institute, apuntando que “sorprende” a porcentaxe asignada polo organismo electoral ao presidente e citando os rexistros de fraude electoral ou o escrutinio alternativo por parte de entidades independentes, polo que cuestiona a veracidade dunha parte dos seus apoios. Tras lembrar que “todas as candidaturas opositoras ou disidentes foron prohibidas”, cualificou as votacións como un “simulacro por parte do poder”, a modo de “trámite que se produce cada seis anos” en forma de “simulación electoral como se foran libres e democráticas, en realidade non o son”. Adhesión a Putin e ao sistema Tamén subliña que o obxectivo era transmitir “esta idea de apoio ou de adhesión dunha grandísima parte da poboación ao presidente Putin, ao sistema e ao réxime ruso”, especialmente ao valorar a situación xeopolítica xerada após a invasión de Ucraína, lanzada “indirectamente contra Occidente”. Nese contexto, que causa “incertezas de tipo económico, enerxético, militar, político”, o proceso electoral pode ser “lido como un fechamento de filas nun período no que o réxime se transformou a través da guerra”, e “polo que poida vir a partir de agora”. Ao respecto, advirte que aínda que “Rusia conseguiu superar o primeiro impacto das sancións occidentais” desde a perspectiva económica, a medio e longo prazo poden presentarse “moitas complicacións” ao outorgar prioridade a “todo o que sexa produción militar” en detrimento doutros sectores. O certo, explica Riu, é que é chave a “capacidade do sistema de manter un certo nivel de benestar para amplas capas da poboación”, algo determinante na “lexitimidade do putinismo” logo da crise provocada pola desaparición da Unión Soviética e o “caos” e “pobreza xeneralizada” que causou. Pola súa parte, Alejandro López, coordinador de Descifrando la Guerra, afirmou a Nós Diario que o resultado “en pleno contexto de guerra” supón un reforzo de Putin a pesar da falta de competitividade dos comicios, detallando que “o como e cando remate o conflito en Ucraína” será fundamental para coñecer se “os ecos” internos e externos levan Putin a tratar de obter un novo mandato en 2030, que sería o último segundo a reforma constitucional recente, ou a un “relevo organizado”. Isto é “un problema que teñen que afrontar moitos dos países con liderados personalistas fortes”, debullando que esta situación dificulta a “organización dunha transición”, e en Rusia “non se está a perfilar un sucesor claro”, o que podería acontecer neste mandato, abrindo a porta a que Putin opte por replicar a súa elección por parte do ex presidente Boris Yeltsin, e nomear ao final da etapa, “practicamente a dedo”, un sucesor, sobre todo ao constatar “a inmensa capacidade de control que ten”. Tanto a Organización das Nacións Unidas (ONU) como os Estados Unidos e a Unión Europea negaron a lexitimidade das votacións que decorreron en Khersón, Zaporijia e o Donbás, áreas adheridas a Rusia en 2022 con posterioridade a uns referendos que a ONU non recoñeceu. Amais, Washington e Bruxelas aseveraron que as eleccións non foron “nin libres nin xustas”. En cambio, Dmitri Peskov, voceiro do Kremlin, definiu como “absurdo” que se poña en dúbida a lexitimidade dos comicios. O presidente ruso adianta unha zona de seguridade en Ucraína Nalgún momento, “cando o consideremos necesario, verémonos obrigados a crear unha determinada zona sanitaria nos territorios controlados” por Kíiv, anunciou Putin, debullando que esa “zona de seguridade” sería “bastante difícil de penetrar usando os recursos de ataque de fabricación estranxeira a disposición do inimigo”. Á vez, alertou de que a chegada de tropas da Organización do Tratado do Atlántico Norte (OTAN) a Ucraína deixaría o planeta “a un paso” dunha nova guerra mundial, no marco da escalada de tensións entre Moscova e a alianza militar liderada polos Estados Unidos ao deixar entrever o presidente francés, Emmanuel Macron, que a posibilidade de despregar tropas en Kíiv está sobre a mesa. Sexa como for, militares da OTAN xa están no país eslavo para operacións de formación, intelixencia e control do armamento, confirmaron Estados membros. O presidente checo, Petr Pavel, abundou en que os programas de formación militar da OTAN en Ucraína xa estaban activos hai unha década, cando estoupou unha guerra interna no país e Crimea foi incorporada após un plebiscito a Rusia. A tensión tamén está a intensificarse en Transnistria por mor da explosión nunha área militar dun helicóptero, do que as autoridades responsabilizaron un drone cuxo voo foi rexistrado desde as proximidades da fronteira con Ucraína. Así e todo, a presidenta moldova, Maia Sandu, insistiu en que é unha “provocación”, desbotando a autoría ucraína do sucedido.