O PSD confía en que a vitoria nos Azores o impulse nos comicios portugueses

Despois de 32 anos, o conservador Partido Social Democrata (PSD) volveu imporse nunhas eleccións rexionais nos Azores. A Aliança Democrática (AD), a coalición que tamén se replicará a nivel estatal nas eleccións parlamentarias adiantadas do 10 de marzo, e que une o PSD, o Partido do Centro Democrático Social (CDS) e o Partido Popular Monárquico (PPM), fíxose nas votacións do domingo con 26 dos 57 asentos no lexislativo rexional ao obter 42% dos sufraxios. A segunda posición foi para o Partido Socialista (PS), con 36% e 23 escanos após perder máis de tres puntos con relación ás eleccións de 2020, por diante da extrema dereita do Chega, que pasou de dous a cinco postos ao superar 9% dos votos. Pola súa parte, o Bloco de Esquerda (BE) caeu de dous a un con 2,54%, co que terá a mesma representación que a Iniciativa Liberal (IL), con 2,15%, e o Pessoas–Animais–Natureza (PAN), con 1,65%. A Coligação Democrática Unitária (CDU), encabezada polo Partido Comunista, quedou en 1,58%, a apenas 80 votos de recuperar a presenza no lexislativo azoriano que perdeu hai catro anos, nuns comicios cunha participación de 50,33% do electorado. Os resultados permitirán a José Manuel Bolieiro (PSD) dirixir o arquipélago os vindeiros catro anos, logo do aval das urnas ao que se denominou no país unha geringonça de dereita, o pacto en 2020 de Bolieiro para gobernar co CDS e o PPM, e co apoio parlamentario do Chega e mais da IL. Todo isto a pesar de que a falta de acordo entre as forzas conservadoras e de extrema dereita forzou un adianto de varios meses das eleccións rexionais ao non ser quen de aprobar o orzamento para este ano, nunha lexislatura na que un deputado do Chega rematou como independente e o da IL rachou co acordo para apoiar o Goberno na Assembleia Legislativa. Aínda así, o certo é que a AD quedou a tres escanos da maioría absoluta, o que leva a Bolieiro a ter que tomar unha decisión que “terá repercusións nacionais”, explica o Jornal de Notícias, negociar un acordo coa extrema dereita ou un entendemento co PS para evitar o pacto co Chega, unha resolución que “poderá dar pistas” sobre a decisión que tomarían os conservadores no caso de que en marzo tivesen que afrontar un escenario semellante. Porén, o presidente insular insistiu en que “gobernarei cunha maioría relativa, e non se trata dunha minoría, unha vitoria nunca é unha minoría”, e o líder do PSD, Luís Montenegro, afirmou que o único Goberno alternativo posíbel sería entre Chega e PS ao tempo que intentaba evitar as preguntas ao respecto das e dos xornalistas. En paralelo, André Ventura, presidente do Chega, asegurou que “ningunha maioría é posíbel” sen a ultradereita, e subliñou que “imos traballar” para lograr un “acordo de Goberno” que brinde estabilidade á rexión. O secretario xeral do PS, Pedro Nuno Santos, rexeitou que vaia outorgar viabilidade ao Executivo de Bolieiro, apuntando a que “agardará as decisións dos órganos rexionais” do partido, así como facer unha lectura nacional dos resultados. Camiño ás eleccións de marzo O certo é que segundo as últimas enquisas publicadas arredor dos comicios parlamentarios adiantados de marzo hai moitas posibilidades de que os conservadores teñan que encarar unha situación moi parecida. A meirande parte dos traballos demoscópicos que transcenderon no último mes avanzan que o PS será a formación máis votada, perdendo iso si unha parte significativa dos 120 asentos cos que conta na Assembleia da República, o que o permitiu desde comezos de 2022 gobernar con maioría absoluta. Nesta liña, AD lograría a segunda praza, co Chega na terceira e reducindo cada vez máis a distancia coa coalición conservadora. A sondaxe feita pública a comezos de febreiro pola canle SIC e o xornal Expresso prevé que o PS terá 29%, 27% a AD e 21% o Chega, co BE e a IL empatados en 5% diante da CDU, con 3%, e o PAN, con 1%, o mesmo que o Livre. A nivel de escanos isto traduciríase en 81 para o PS, 7 para o BE, 3 para a CDU e 1 para o Livre no campo da esquerda. Na dereita, a AD conseguiría 74, o Chega 56 e a IL 8, excedendo a maioría absoluta en máis de 20 escanos. En comparación coa anterior enquisa da mesma compañía, Iscte/ICS, as formacións progresistas e a AD están estancadas, pero a extrema dereita medrou catro puntos. Outra sondaxe, efectuada por Aximage e datada nos últimos días de xaneiro nos xornais Diário de Notícias, Jornal de Notícias e a radio TSF, eleva a 32,7% a estimación de voto para o PS, coa AD en 27,4%, o Chega en 16,2, 8% para o BE, 4,2% para a IL, 2,9% para o PAN, 2,6% para a CDU e 1,9% para o Livre. Estes resultados reportarían 89 lexisladoras e lexisladores ao PS, 16 ao BE, 2 ao PAN e á CDU e 1 ao Livre, á vez que a AD alcanzaría 72, 43 o Chega e 5 a IL, garantíndose tamén nestas circunstancias a maioría absoluta no lexislativo luso que sairía das eleccións de marzo. Albuquerque sae do liderado do Goberno da Madeira A dimisión do presidente do Goberno rexional da Madeira, Miguel Albuquerque (PSD), é efectiva desde hoxe, trasladou o luso Público, que indica que o decreto de Ireneu Barreto, representante da República no territorio, que formaliza a decisión, podería ser publicado mañá, pero tería vixencia desde a segunda feira. Albuquerque renunciou tras ser imputado nunha operación contra a corrupción por presuntamente favorecer empresas construtoras de persoas achegadas. Un ex socio del recibiu case 60 millóns de euros en contratos públicos entre 2015 e 2020. Fica pendente de comprobar o efecto nas enquisas da acusación contra o alto cargo dos conservadores. Debates entre as candidaturas Nuno Santos, candidato do PS, e Rui Rocha, da IL, inauguran hoxe a serie de até 30 debates que se estenderán até o 23 de febreiro entre todas as formacións con representación. Amais, no último participarán todas estas forzas, e o 20 producirase un cos partidos sen representación. O 19 de febreiro está programado o debate entre Nuno Santos e Montenegro, do PSD, os dous candidatos con máis posibilidades de converterse en primeiro ministro.