O presidente de Sri Lanka, Gotabaya Rajapaksa, fuxiu esta cuarta feira nun avión militar con destino Maldivas. Fíxoo un par de días despois de anunciar primeiro e confirmar despois a súa dimisión como máximo dirixente do país asiático.
Foi a Forza Aérea de Sri Lanka (SLAF) a que confirmou que fretara unha aeronave para Rajapaksa, a primeira dama, o ex ministro de Finanzas e irmán do presidente saínte, Basil Rajapaksa, e dous funcionarios de seguridade.
Segundo a SLAF, este voo foi autorizado de acordo cos poderes que a constitución de Sri Lanka lle outorga á persoa que ocupa a Presidencia do país. Foi o Goberno actual, a través do Ministerio de Defensa, quen solicitou e aprobou a viaxe, respectando as directrices legais en materia migratoria e alfandegueira.
Segundo detallou a BBC, Gotabaya Rajapaksa aterrou en Maldivas pasadas as 3 (hora local) xunto co resto da súa comitiva. Poucas horas antes de coller este avión, os Estados Unidos (EUA) rexeitaran a súa solicitude de visado.
Revolución en Sri Lanka
Centos de manifestantes entraron este sábado na residencia oficial do presidente de Sri Lanka en Colombo, Gotabaya Rajapaksa, durante unha xornada de protestas masivas para esixir a dimisión do presidente pola súa xestión da crise económica.
Segundo a prensa local, os manifestantes crebaron o perímetro de seguridade que rodeaba a residencia oficial de Rajapaksa. A Policía recorreu aos gases lacrimóxenos para evitar a intrusión, aínda que o presidente abandonara previamente a zona.
Fontes do Ministerio de Defensa declararon que o presidente Gotabaya Rajapaksa fora evacuado das instalacións oficiais xa na sexta feira para garantir a súa seguridade antes da manifestación prevista para a fin de semana.
