A Policía francesa detivo xa a 3.200 persoas a raíz das protestas pola morte de Nahel

A noite entre a segunda feira e a terza feira foi a sétima consecutiva de protestas en Francia tras o asasinato dun mozo de 17 anos, Nahel, a mans dun axente de policía. Perto de 3.000 detencións desde o inicio das protestas en Francia pedindo "xustiza para Nahel" Antes, na sexta noite de protestas, o último balance do Ministerio do Interior francés apuntou que houbo 157 novas detencións, 20 delas en París e os seus arrabaldes, así como un total de 352 incendios na vía pública. No transcurso da noite, un bombeiro faleceu mentres realizaba labores de extinción no barrio de Saint-Denis, en París. Porén, as autoridades non especificaron se o incendio foi provocado no marco dos disturbios. "Esta noite, mentres loitaba contra o incendio de numerosos vehículos nun aparcamento subterráneo en Saint-Denis, un mozo cabo de 24 anos da Brigada de Bombeiros de París morreu, pese a que foi rapidamente atendido polos sanitarios", sinalou o ministro do Interior de Francia, Gérald Darmanin. A do domingo á segunda feira, foi, con todo, unha noite con menos apresamentos, pois na xornada anterior foran detidas máis de 700 persoas e na noite da sexta feira, máis de 1.000. En conxunto, o balance ascende desde que comezaron os disturbios hai case unha semana a arredor de 3.200 detencións e uns 45.000 axentes policiais despregados nas rúas polo Goberno francés, así como vehículos blindados. Así, o Ministerio de Interior francés xa ten rexistrados 3.200 arrestos, un dato que alcanza xa ao das masivas protestas que experimentou Francia en 2005, tamén a raíz da morte de dous mozos tras ser perseguidos por axentes policiais, mais coa diferenza de que agora se chegou a este número de persoas detidas en seis días no canto das tres semanas que pasaran daquela. A media de idade das persoas que foron apresadas nas protestas ronda os 17 anos Das 3.200 persoas detidas, unha porcentaxe de 60% do total non teñen antecedentes policiais "e non foron nunca obxecto de ningún tipo de control". Con respecto á idade das persoas detidas, a media ronda os 17 anos, con casos de menores de 12 ou 13 anos que a policía vincula a incendios, e ataques contra as forzas de seguridade, así como contra diversos edificios. Nas cinco noites de protestas, o Goberno contabilizou 5.000 vehículos e 10.000 papeleiras incendiadas, 1.000 inmóbeis danados, 250 ataques contra comisarías e máis de 700 policías ou xendarmes feridos. Darmanin prometeu que as autoridades seguirán "moi mobilizadas" con vistas a "restabelecer a orde", un compromiso lanzado en reiteradas ocasións nos últimos días polas autoridades. Crise de Estado O presidente, Emmanuel Macron, recibiu esta segunda feira os presidentes do Senado, Gérard Larcher, e da Asemblea Nacional, Yaël Braun-Pivet, mentres a primeira ministra, Elisabeth Borne, mantivo un encontro cos portavoces dos grupos da Asemblea Nacional, "nunha lóxica de intercambios" a fin de analizar a tensa situación que se está a vivir en moitas cidades do Estado. As detencións policiais na última noite de protestas en Francia superaron as 870 Así mesmo, esta terza feira Macron reunirase no Elíseo cos rexedores dos máis de 220 municipios afectados polas protestas. Precisamente os alcaldes de Francia convocaron fronte a todos os consistorios senllas "mobilizacións cívicas" que tiveron lugar esta segunda feira, após o violento ataque no domicilio do alcalde de L'Haÿ Les Roses -ao sur de París-, Vincent Jeanbrun, contra o que fixeron chocar un vehículo incendiado. A alcaldesa da capital, Anne Hidalgo, reclamou "unha explosión de respecto" como contrapeso aos disturbios. Nova testemuña Entre tanto, o axente que efectuou o disparo que lle custou a vida a Nahel, e cuxa actuación foi posta en dúbida polas autoridades, permanece en prisión provisional como sospeitoso dun delito de homicidio. Nahel viaxaba a bordo dun vehículo xunto a outras dúas persoas, mais até esta segunda feira non reapareceu o terceiro dos ocupantes do coche. Esta persoa, cuxa identidade non transcendeu, compareceu ante a Inspección Xeral da Fiscalía Nacional (IXPN) para declarar en calidade de testemuña do acontecido, segundo sinalaron fontes xudiciais citadas polo xornal francés Le Figaro. Segundo o fiscal Pascal Prache, os dous policías sacaron as súas armas, achegáronse ao coche e exixiron ao mozo que apagase o motor. Con todo, Nahel tentou afastarse do lugar e un dos axentes disparoulle a curta distancia a través da porta do coche. A bala atravesou o brazo esquerdo e o peito do mozo, matándoo. Declaracións da avoa Por outra parte, a avoa do mozo falecido realizou declaracións á canle BFM, nas que afirmou que "confía" na Xustiza e lamentou que haxa quen utilice o "pretexto" da tráxica morte de Nahel para "vandalizar escolas e vehículos". Ademais, a familiar da vítima de asasinato tamén manifestou que "lle rompe o corazón" escoitar e ver as mostras de apoio ao axente que disparou. As protestas contra a violencia policial espállanse polo territorio francés "Quero que todo isto pare. Á xente que está a romper cousas dígolles que paren. Que non destrúan as escolas, que non destrúan os autobuses, porque son as nais quen os usa", lamentou a muller, identificada como Nadia. "Estou cansada. Acabouse, a miña filla xa non ten vida", expresou a avoa da vítima. A ONU exixe que o país galo atalle o racismo da súa Policía A oficina das Nacións Unidas (ONU) para os dereitos humanos expresou a súa "preocupación" pola morte de Nahel, e sinalou que "é o momento para o Estado francés atalle de maneira seria os graves problemas de racismo e discriminación nas forzas de seguridade". A portavoz do Alto Comisionado da ONU para os dereitos humanos, Ravina Shamdasani, chamou a respectar o dereito de reunión e pediu ás autoridades galas que atallen calquera posíbel "elemento violento" nas protestas tendo en conta os principio de "legalidade, necesidade, proporcionalidade, non discriminación, precaución e rendición de contas". Investigar o uso excesivo da forza Neste sentido, Shamdasani chamou a investigar "rapidamente" calquera posíbel sospeita sobre un uso excesivo da forza na represión destas protestas. Porén, o Estado francés nega o racismo na Policía. 13 cidadáns galos morreron en controis policiais no ano 2022 Francia "toma nota" das críticas do Alto Comisionado, mais saíu ao paso sinalando que calquera acusación dun posíbel racismo "sistémico" no seo da Policía é "totalmente infundada". Non obstante, en 2022, rexistrouse no Estado galo a cifra récord de 13 mortes en intentos de deter persoas que trataron de saltar controis policiais.