Case 5.000 mortes polos terremotos que afectaron Turquía e Siria

Ás 4.17 horas da mañá da segunda feira, un terremoto de 7,8 graos na escala de Richter, segundo as estimacións do Servizo Xeolóxico dos Estados Unidos, e con epicentro no distrito de Pazarcik, na provincia turca de Kahramanmaraş, arrasou milleiros de edificacións e provocou importantes perdas humanas e materiais no sur de Turquía e no norte de Siria. Á hora de feche desta edición o número de falecidos confirmados polas autoridades turcas e sirias achegábase ás 5.000 persoas, 3.381 en Turquía e 1.444 en Siria. O número de persoas feridas alcanza as 15.000. No que atinxe a Turquía, máis de 6.000 persoas foron rescatadas e arredor de 5.600 edificios acabaron convertidos en cascallos por un sismo que chegou a sentirse en Chipre, Palestina, Líbano, o Iraq, Xeorxia ou Armenia, até foi percibido polos sismógrafos en Groenlandia. “Espertar no medio da noite con todo o edificio a tremer foi a peor sensación que nunca tiven e fixo que fora moi difícil escapar”, afirmou Alaa Nafi, veciño de Idlib, en Siria, para o que o sismo foi “extremadamente horríbel e aterrador”. Na mesma cidade, Osama Adbelhamid narrou a medios internacionais que a meirande parte dos seus veciños perderon a vida ao virse abaixo o edificio de catro pisos no que vivían mentres corrían cara á porta da vivenda. Mohamad El Chamaa, estudante en Beirut, a capital libanesa, trasladou á BBC que “todo o edificio comezou a tremer”, e asegurou que o movemento sísmico durou entre catro e cinco minutos, explicando que “estaba xusto ao lado da fiestra e asustoume que puidese romper”. Máis de 1.400 mortos por un terremoto de magnitude 7,8 en Turquía e Siria A devastación incrementouse cun novo sismo de 7,6 graos horas despois a máis de 100 km en dirección norte, con máis dunha vintena de réplicas ao longo da rexión que superaron os 4 graos. O terremoto chegou a destruír parte do castelo turco de Gaziantep, un importante foco turístico no país, sinalou Anatolia, mentres que en Alepo, cuxa cidadela está considerada como Patrimonio da Humanidade pola Organización das Nacións Unidas para a Educación, a Ciencia e a Cultura (Unesco), foron detectados danos que están a ser avaliados polos especialistas sirios, indicou SANA. Amais, o movemento sísmico derrubou un hospital en Iskenderun ou a única pista do aeroporto de Hatay, en Turquía. Até 10 grandes cidades con até 10 millóns de persoas na contorna do epicentro padeceron os danos máis graves, incluída Diyabakir, a capital do Kurdistán turco, e afectou especialmente a máis de tres millóns de refuxiados sirios que se concentran especialmente nesa zona do territorio turco, e que fuxiron do seu país por mor de máis dunha década de guerra. Xa en Siria, as provincias máis afectadas son as de Idlib, Alepo e Latakia. O terremoto produciuse na falla de Anatolia Oriental, no límite entre as placas tectónicas converxentes de Anatolia e a placa árabe, onde se veñen acumulando sismos importantes nas últimas dúas décadas, nunha rexión que xa é de por si unha das máis activas no tocante aos movementos sísmicos. As réplicas poden continuar “varios días, semanas e incluso meses”, debullou Chris Elders, docente da Universidade de Curtin en Perth, Australia, que advertiu que “a xente seguirá sentindo os efectos do terremoto durante algún tempo nesa zona”. O sismo levou as autoridades italianas a activar a alerta de tsunami -finalmente descartada- no sur do territorio. Calabria, Sicilia e Apulia foron postas en alerta, afastando a poboación da costa e interrompendo o tráfico ferroviario, con suspensión das aulas na illa de Ischia. Pola súa parte, Ancara decretou o feche das escolas de todo o país até o 13 de febreiro. Operacións de rescate Após o terremoto deron inicio frenéticas operacións de rescate para tratar de salvar o maior número de vítimas do sismo, cuxa supervivencia se fai máis difícil co paso das horas. O vicepresidente de Turquía, Fuat Oktay, advertiu que os rescates decorren baixo “condicións meteorolóxicas extremadamente severas”, pola onda de frío que percorre a rexión, que intensifica as chuvias e mantén os termómetros por baixo dos 0 °C en varias localidades da contorna, e anunciou que foron enviadas 102 unidades de resposta a distintas partes do sur do país. Asemade, AP destaca que a fuxida masiva de persoas nestas provincias “provocou atascos e dificultades aos equipos de emerxencia que trataban de chegar ás zonas afectadas”. En Siria, o persoal de rescate “intenta desesperadamente” sacar a xente entre os cascallos dos edificios, explicou Subaib al-Khalaf, de Al Jazeera, adiantando que o número de vítimas mortais aumentará nas vindeiras horas. “Cada 10 minutos sacan un cadáver”, explicou. “A xente é atendida nos hospitais, mesmo nos corredores, e hai escaseza de sangue”, incidiu o correspondente, que apuntou que o sector sanitario “xa estaba esgotado” antes do sismo pola guerra, isto tamén provocou que a resposta á traxedia desbordara os equipos de defensa civil. Ademais das vítimas entre as persoas refuxiadas en Turquía procedentes de Siria, o medio árabe salienta que no norte sirio xa se atopaban antes do terremoto “millóns de persoas vivindo en tendas de campaña” como resultado do conflito bélico. Axuda internacional Pouco despois de facerse público o sucedido distintos países do mundo como a China, Rusia, Catar, a India, Israel, Irán e os Estados Unidos ofreceron axuda humanitaria para combater as consecuencias do sismo. O mesmo fixo á Unión Europea, que enviou dez equipos de rescate a Turquía procedentes de oito Estados membros. Pola súa parte, Moscova enviou equipos de rescate do Ministerio de Situacións de Emerxencia a Siria após unha conversa do presidente Vladimir Putin co seu homólogo sirio, Bashar al Assad, unha asistencia que estendeu a Ancara horas despois cun acordo co presidente turco, Recep Tayyip Erdogan. Nese sentido, a Oficina da Organización das Nacións Unidas (ONU) para a Coordinación de Asuntos Humanitarios informou de que os seus “equipos están a avaliar os danos” e “preparados para o despregue”. Ao tempo, o secretario xeral da ONU, António Guterres, subliñou que “contamos coa comunidade internacional para axudar as miles de familias afectadas, moitas delas xa tiñan unha grande necesidade de axuda humanitaria”. O "peor desastre" desde 1939 Na súa comparecencia posterior ao sismo, o mandatario turco definiu a traxedia como “o peor desastre que viviu o país no último século, despois do terremoto de 1939 en Erzincan”, que deixou máis de 32.000 mortes e arredor de 100.000 persoas feridas. Nesta ocasión, o profesor do Instituto de Investigación de Terremotos da Universidade Bogazici de Istambul, Mustafa Erdik, explica a alta mortaldade do sismo pola “mala calidade dos edificios” construídos antes do 2000, cando aumentaron os requisitos.