O lexislativo de Turquía prevé aprobar hoxe a ratificación do ingreso de Suecia na Organización do Tratado do Atlántico Norte (OTAN) tras atrasar máis dun ano o presidente Recep Tayyip Erdogan a decisión. A sesión parlamentaria estaba en marcha á hora do feche desta edición.
Erdogan reclamou ao país nórdico a extradición de varios activistas kurdos, que o Goberno turco cualifica de terroristas, mudanzas nas súas leis antiterroristas e mailo desbloqueo estadounidense á venda de avións de combate F-16 a Ancara.
En Hungría, o único Estado que ficaría pendente de dar luz verde ao acceso de Estocolmo á alianza militar liderada polos Estados Unidos, o primeiro ministro, o ultradereitista Viktor Orbán, emitiu un convite ao seu homólogo sueco, Ulf Kristersson, para abordar o asunto.
Asemade, a OTAN fixo público que asinou un contrato de 1.100 millóns de euros para a compra de municións de artillaría para repor os seus arsenais e enviar a Ucraína. Non obstante, as primeiras entregas agárdanse a finais de 2025.
