Cinco países da UE piden prorrogar o veto ao gran de Kíiv

Bulgaria, Eslovaquia, Hungría, Polonia e Romanía, Estados membros da Unión Europea (UE), demandaron esta cuarta feira ao bloque comunitario prorrogar a prohibición ás importacións de trigo, millo, colza e sementes de xirasol procedentes de Ucraína a estes países, e que expiraría o 15 de setembro. A petición produciuse apenas dous días despois de que Rusia confirmara que non prorrogará o acordo de exportación de gran ucraíno polo Mar Negro até que se cumpran os aspectos do pacto referidos ás exportacións rusas de cereais e fertilizantes. Perante esta situación, estes cinco países temen que a fin desta ruta incremente o fluxo de gran ucraíno cara a eles, provocando un novo funil como os que viñeron decorrendo no último ano e medio, e que xeraron fortes baixadas dos prezos e dos ingresos para o sector agrícola local ao acumularse millóns de toneladas de gran no seu territorio. O ministro de Agricultura de Hungría, Istvan Nagy, confirmou a Reuters de camiño á xuntanza en Varsovia, Polonia, co seu homólogo búlgaro, polaco, eslovaco e romanés, que reclaman que a prohibición se manteña até o 31 de decembro, amais de debater a opción de que calquera destes países poida solicitar á UE engadir produtos adicionais aos xa vetados. “Obviamente, polo seu gran tamaño, todo o que Ucraína produce e exporta a Europa altera o mercado”, indicou Nagy, engadindo que o mesmo acontece co polo, os ovos ou o mel. Asemade, detallou que a pesar de que as colleitas de millo e xirasol non comezaron en Hungría aínda contan con gran ucraíno almacenado. Robert Telus, o titular de Agricultura de Polonia, defendeu antes da xuntanza a súa disposición a mellorar o transporte de mercadorías polo seu territorio, mais a UE tería que brindar axuda para a infraestrutura. O veto orixinal, que non impide o tránsito de produtos ucraínos en dirección a terceiros países, foi aceptado pola Comisión Europea presidida por Ursula von der Leyen tras comezar estes Estados a impor a mediados de abril as súas propias prohibicións polo efecto da entrada masiva de gran ucraíno neses mercados, que desatou protestas das labregas e labregos, así como por seguridade alimentaria, ao confiscarse cando menos un millón e medio de toneladas de cereais en varios países ao detectarse pesticidas prohibidos na UE con risco para a saúde humana. Malia que en primeira instancia o Executivo da UE sostivo tras a decisión destes países que as “accións unilaterais non son aceptábeis” ao ser a política comercial unha competencia de Bruxelas, acabou por ceder no marco do debate interno sobre a extensión dun ano -xa aprobada- da suspensión de aranceis aos produtos ucraínos, estabelecida polo bloque comunitario após a invasión rusa. Tres meses para reactivar a iniciativa do Mar Negro A voceira do Ministerio de Asuntos Exteriores ruso, Maria Zajarova, comunicou esta cuarta feira que a Organización das Nacións Unidas (ONU) “aínda dispón de tres meses para conseguir resultados concretos”, en alusión aos apartados non cumpridos dos acordos de exportación de cereais polo Mar Negro, asinados en xullo de 2022 e nos que apenas 3% da carga transportada foi dirixida a Estados de baixos ingresos, co bloque comunitario recibindo arredor de 40% das mercadorías. “Polo tanto, agora non hai que correr aos micrófonos da Secretaría da ONU, senón utilizar estes tres meses para conseguir resultados específicos”, insistiu, afirmando que nese caso “volveremos discutir este asunto”. Asemade, explicou que o pacto entre Rusia e a ONU para facilitar as súas exportacións, anexo ao acordo sobre gran ucraíno ao que se sumaron Turquía e Ucraína, define unha duración de tres anos, cunha notificación con tres meses de antelación se unha das partes se quere retirar. Nese sentido, un alto funcionario da UE trasladou a EFE que buscan que a ONU lles comunique cales son as condicións rusas para reactivar a iniciativa, “logo teremos un debate interno e despois os Estados membros tomarán a decisión”. Rusia recoñeceu os esforzos do secretario xeral da ONU, António Guterres, mais apuntou cara ás sancións impulsadas pola Organización do Tratado do Atlántico Norte como o principal problema. Ademais, Moscova reiterou en distintas ocasións que o compromiso da ONU era facilitar que o Banco Agrícola Ruso se integrase de novo no sistema de pagos Swift, levantar as restricións a seguros de transporte marítimo e ao acceso aos portos de buques rusos, desconxelar as contas das empresas rusas de fertilizantes, reactivar a subministración de maquinaria agrícola a Rusia e o tránsito de amoníaco polo conduto entre Togliatti (Rusia) e Odesa (Ucraína), paralizado coa invasión rusa e que sufriu unha explosión en xuño no treito en territorio ucraíno, da que Rusia acusa os militares de Kíiv. Guterres lamentou a suspensión do acordo por parte de Rusia, sinalando que “pagarán o prezo” centos de millóns de persoas que enfrontan a fame e os consumidores que enfrontan “unha crise mundial do custo da vida”. Así e todo, admitiu que a exportación de alimentos e cereais rusos padece obstáculos que aínda non foron solucionados, e defendeu o avance en áreas como a desconxelación de activos das compañías de fertilizantes rusas, algo do que se beneficiaron 70% das empresas incluídas na listaxe presentada por Moscova, tras derrogar a UE un fragmento do noveno paquete de sancións coercitivas contra Rusia. Esta medida, subliña a ONU, permitiu que o organismo internacional “facilitara doazóns humanitarias destes produtos á maior parte dos países necesitados de África”. En paralelo, Rusia abordará a fin de mes na cimeira cos países africanos a subministración gratuíta dos cereais ucraínos que ían destinados aos Estados máis empobrecidos do continente. Putin non asistirá á cimeira dos Brics A Presidencia de Suráfrica confirmou esta cuarta feira que “por acordo mutuo” o presidente ruso, Vladimir Putin, non viaxará ao país ao cumio do grupo Brics, que decorrerá en agosto. Putin será substituído polo ministro de Asuntos Exteriores, Sergei Lavrov, nunha reunión na que estarán os xefes de Estado da India e do Brasil, amais de Suráfrica. A posíbel presenza de Putin provocara un choque entre os países occidentais e Pretoria, que se negaba a detelo tras a orde de arresto emitida pola Corte Penal Internacional, que o acusa da deportación forzosa de crianzas das zonas implicadas na guerra en Ucraína.