A OTAN frea a adhesión de Ucraína entre críticas de Kíiv

Ucraína unírase á Organización do Tratado do Atlántico Norte (OTAN) “cando os aliados estean de acordo e se cumpran as condicións”, ratificou na terza feira o secretario xeral da alianza militar liderada polos Estados Unidos, Jens Stoltenberg, tras o debate na primeira xornada da cimeira anual da entidade en Vilnius, Lituania, que remata a cuarta feira. Amais, subliñou que o proceso para a entrada de Kíiv na alianza militar pasará de dous pasos a un, ao acordarse que o país eslavo non se someterá ao Plan de Acción para a Adhesión, que a propia OTAN considera “un mecanismo clave de preparación” para o ingreso de novos Estados. Nun comunicado posterior, a OTAN destacou que “o futuro de Ucraína está na OTAN”, explicando que “os aliados continuarán apoiando e revisando o progreso de Ucraína en interoperatividade, así como as reformas democráticas e do sector de seguridade adicionais que se requiren”. Asemade, Stoltenberg admitiu que a alianza militar leva desde 2014, coincidindo co golpe de Estado en Ucraína apoiado polos Estados Unidos que levou ao poder a grupos pro OTAN, enviando apoio militar a Kíiv. A posición fixada pola alianza militar concorda coa postura defendida durante o debate polos Estados Unidos e Alemaña, que se negaban a proporcionar un convite para o ingreso de Kíiv vinculado coa fin da guerra no país, como exixían Polonia, Lituania, Estonia ou Letonia. Aínda así, fontes da OTAN trasladaron a medios internacionais que o documento, xunto a un paquete plurianual con varios milleiros de millóns de euros para armamento e o impulso do Consello OTAN-Ucraína, supón a relación máis estreita entre a alianza militar e un Estado non membro. En todo caso, e a medida que avanzaba o debate no seo da OTAN, o presidente ucraíno, Volodimir Zelenski, considerou unha falta de respecto por parte da alianza militar que “a fórmula só se refira á invitación, e non á adhesión de Ucraína”, definindo como “absurdo e sen precedentes” que non se fixe unha data para a entrada de Kíiv. “Semella que non hai dispoñibilidade”, sostivo Zelenski, que defendeu que “isto significa que se está a deixar aberta unha xanela de oportunidade para negociar a pertenza á OTAN de Ucraína en negociacións con Rusia”, asegurando que “para Rusia isto significa un motivo para continuar o terror”. Pola súa parte, a voceira do Ministerio de Asuntos Exteriores ruso, Maria Zajarova, ironizou co convite de adhesión da alianza militar a Finlandia e Suecia mais non a Ucraína. “De que axuda están falando? Isto significa que os membros da OTAN estiveron empurrando Ucraína cara ao mundo occidental cando Ucraína pide axuda, abandonárona”. Ao tempo, o voceiro do Kremlin, Dmitri Peskov, sinalou que a entrada de Ucraína na OTAN implicaría un “perigo absoluto” para Rusia, polo que adiantou “consecuencias moi negativas” para a seguridade en Europa, explicando que “requiriría unha reacción bastante firme e comprensíbel” das autoridades rusas, polo que “os que adoptan esa decisión deberían ser conscientes diso”. Un dos motivos esgrimidos por Moscova para desencadear a invasión de Ucraína é garantir que Kíiv non acceda á OTAN polos riscos á súa seguridade, un punto que tanto a alianza militar como os Estados Unidos se negaron a aceptar nas discusións con Moscova a comezos de 2022. Así e todo, nas primeiras semanas após a invasión o presidente Zelenski tería acordado co seu homólogo ruso, Vladimir Putin, renunciar á adhesión á OTAN nun pacto para pór fin ás hostilidades que Washington e outros membros da alianza militar forzaron Kíiv a rachar, segundo recoñeceu o daquela primeiro ministro israelí, Neftali Bennett. Entrada de Suecia Peskov tamén indicou que o ingreso de Suecia na OTAN xera repercusións negativas para a seguridade de Rusia, apuntando que tomarán medidas similares ás desenvoltas coa adhesión de Finlandia. Prevese que os lexislativos de Turquía e Hungría aproben nas próximas xornadas o ingreso de Estocolmo, após dar luz verde á última hora da segunda feira o mandatario turco, Recep Tayyip Erdogan, que poucas horas antes de confirmar a mudanza de posición condicionara este paso co acceso de Ancara á Unión Europea (UE). Con posterioridade ao anuncio de Erdogan, o presidente estadounidense, Joe Biden, fixo público que consultará co Congreso a venda de avións de combate F-16 a Turquía, entrementres, o secretario de Defensa, Lloyd Austin, abordou o papel americano na modernización do Exército turco coas autoridades de Ancara. Á vez, Suecia transmitiu o seu apoio ao reinicio do proceso de integración de Turquía na UE e a dúas reclamacións de Ancara, a revisión da unión aduaneira Turquía-UE e a liberalización de visados para a cidadanía turca no bloque comunitario. Contraofensiva A cimeira da OTAN chegou na sexta semana desde o comezo da contraofensiva das Forzas Armadas ucraínas, e cuxo resultado determinará segundo os medios especializados a posición da alianza militar con respecto a Ucraína, forzándoa a negociar con Rusia para acabar coa guerra en caso de fracaso e freando a entrega de asistencia. Desde a invasión rusa os membros da OTAN e países da súa contorna entregaron a Ucraína máis de 170.000 millóns de euros, a maioría en armamento. Até o de agora, os militares ucraínos comunicaron que conseguiron facerse co control de oito asentamentos e 154 km cadrados, unha superficie equivalente a dous terzos do termo municipal de Compostela, e están aínda lonxe da principal liña de defensa rusa. Elévase a 2% do PIB o gasto en Defensa Nove anos despois de marcar como obxectivo aumentar até 2% do produto interior bruto o gasto en Defensa, os 31 membros da OTAN pactaron que ese 2% se converta no gasto mínimo nese ámbito. No comunicado conxunto tamén cualificaron Rusia como a “ameaza máis importante e directa para a seguridade dos aliados” e citaron o terrorismo como a “ameaza asimétrica máis directa”. No que atinxe á China, o documento asevera que as súas “ambicións declaradas” e “políticas coercitivas” comprometen “intereses, seguridade e valores” da alianza militar.