O número de crianzas que arriscan a vida para chegar a Europa a través da perigosa ruta do Mediterráneo central aumenta 30%

Máis de 11.600 nenos e nenas cruzaron o mar Mediterráneo central cara á Unión Europea (UE) sen os seus pais, nais ou titores legais entre xaneiro e mediados de setembro de 2023 a través da mortífera ruta do Mediterráneo central que desemboca no Estado italiano. A UE defende unha xestión migratoria con "compaixón" malia as 2.300 mortes no Mediterráneo en 2023 Isto supón un aumento de 60% respecto ao mesmo período de 2022, cando unhas 7.200 crianzas non acompañadas ou separadas das súas familias fixeron esta perigosa travesía, salientou esta sexta feira o Fondo das Nacións Unidas para a Infancia (Unicef). Lampedusa, unha pequena illa no sur de Italia, é a miúdo a primeira escala de quen busca asilo, seguridade e oportunidades na UE. O número de chegadas a esta localización rexistrou o seu máximo este mes, alcanzando até 4.800 persoas nun só día. As crianzas que emprenden soas estas terríbeis viaxes fano a miúdo en botes inchábeis masificados ou en barcos pesqueiros de madeira en malas condicións, nada apropiados cando se dan unhas condicións meteorolóxicas adversas. A algunhas as colocan na adega do barco e a outras sobre barras de ferro, especialmente perigosas para a navegación. A falta dunhas funcións de procura e rescate adecuadas e coordinadas a nivel comunitario, e de cooperación durante o desembarco, agrávanse os problemas que enfrontan estas crianzas cando atravesan o mar. A guerra, os conflitos, a violencia e a pobreza son algunhas das principais causas que levan estes nenos e nenas a abandonar os seus fogares en soidade. Ademais, as probas demostran que as crianzas non acompañadas están en risco de explotación e abuso en cada paso da súa viaxe, en especial as nenas, así como as crianzas que proceden de África subsahariana, que teñen maior probabilidade de sufrir abusos. Entre xuño e agosto morreron ou desapareceron o triplo de migrantes no Mediterráneo central que no mesmo período do ano anterior Entre xuño e agosto deste ano, polo menos 990 persoas, incluíndo nenos e nenas, morreron ou desapareceron cando tentaban cruzar o Mediterráneo central, o triplo que no mesmo período do ano anterior (cando 334 persoas perderon a vida). Moitos destes naufraxios non deixan sobreviventes e outros moitos quedan sen rexistrar, polo que é probábel que o número de vítimas sexa moito maior. Por outra parte, as crianzas que sobreviven a estas viaxes son acollidas primeiro en centros coñecidos como 'puntos quentes', antes de ser derivados a instalacións de recepción que a miúdo son fechadas e limitan os movementos. En concreto, máis de 21.700 nenos e nenas non acompañadas atópanse nestes momentos en instalacións deste tipo en toda Italia, fronte ás 17.700 rexistradas hai un ano. “O mar Mediterráneo converteuse nun cemiterio para as crianzas e o seu futuro. A devastadora peaxe que se cobra cos nenos e nenas que buscan seguridade e asilo en Europa é o resultado de decisións políticas e dun sistema migratorio roto”, afirmou Regina De Dominicis, directora de Unicef para Europa e Asia Central e coordinadora especial para a Resposta a Refuxiados e Migrantes en Europa. “Para evitar máis sufrimento de nenos e nenas necesítase desesperadamente adoptar unha resposta en toda Europa para apoiar as crianzas e familias que buscan asilo e seguridade, así como aumentar de maneira sostida a axuda internacional para apoiar os Estados que enfrontan múltiples crises”, engadiu. En concordancia co Dereito Internacional e a Convención sobre os Dereitos da Crianza, Unicef solicitou aos Gobernos para que proporcionen vías seguras e legais a quen pide asilo, garantan que os nenos e nenas non son retidos en instalacións fechadas, fortalezan os sistemas de protección infantil para protexer mellor ás crianzas migrantes, coordinen operacións de procura e rescate e garantan o desembarco en lugares seguros. O actual debate entre o Parlamento Europeo e os Estados da UE sobre o Pacto de Migración e Asilo supón unha oportunidade inmediata para reafirmar e apoiar principios de protección infantil esenciais, así como para desenvolver políticas que impidan as múltiples vulneracións dos dereitos da infancia nos Estados de partida, tránsito e chegada, afirmou a organización. Ademais, Unicef sinalou que continúa o seu traballo de apoio aos Estados para fortalecer os sistemas e o apoio nas comunidades de orixe, previr e mitigar os riscos que afrontan as crianzas en movemento, e proporcionar apoio e servizos inclusivos para todos os nenos e as nenas, independentemente do seu estado legal ou da situación dos seus pais ou nais. No caso concreto de Lampedusa, Unicef explicou que ofrece servizos de protección esencial, incluídos apoio psicosocial e á saúde mental, así como acceso a información e derivación a servizos especializados. Situación da protección ás crianzas no Estado español Segundo os datos achegados por Unicef España a Nós Diario, estímase que no Estado español hai máis de 700.000 nenos e nenas migrantes. A 14 de maio de 2023, existían 8.188 autorizacións de residencia a crianzas do sistema de protección e 9.378 a persoas mozas ex tuteladas. Segundo denuncia a organización, "as crianzas migrantes e refuxiadas normalmente non reciben educación individual nin apoio psicosocial nas escolas". Un campo de refuxiados e un valo como o de Melilla no centro da Coruña As Illas Canarias son o principal punto de entrada de crianzas migrantes e persoas refuxiadas ao Estado español. A entrada por outras zonas fronteirizas do Sur (Andalucía, Ceuta, Melilla, Murcia, Valencia, Baleares) é continua mais de menor contía neste momento. Así, Canarias acolle o maior número de crianzas non acompañadas e separadas dos sistemas de protección de menores, máis de 2.700. Un sistema que "está sobresaturado" O sistema de protección de menores migrantes "está sobresaturado" no Estado español, sinala a Nós Diario Unicef España, "o que dá lugar a grandes centros de emerxencia e atrasos na xestión de casos, así como a graves deficiencias nas avaliacións do interese superior e na identificación de casos vulnerábeis, incluídas as necesidades de protección internacional". En Ceuta e Melilla, engade a organización, "hai unha saturación crónica do sistema de coidado infantil". A UE desbota as cotas para o asilo de migrantes O Goberno de Polonia cargou esta sexta feira contra o plan migratorio que negocian os Estados da Unión Europea (UE), que tamén rexeita Hungría. Porén, todo parece que indicar que o plan seguirá adiante, unha vez Alemaña levantou o seu non. Londres aproba unha lei migratoria que viola o dereito internacional Con todo, co novo texto, a UE desbota a cooperación no asilo a través dun sistema de cotas obrigado para o reparto das persoas na xeografía comunitaria, senón que cada Estado poderá pagar para que non cheguen migrantes ao seu territorio.

O número de crianzas que arriscan a vida para chegar a Europa a través da perigosa ruta do Mediterráneo central aumenta 30%

Illa rexeita ser president cos votos do PP e reduce as opcións para dirixir a Generalitat a Aragonès ou Puigdemont

A ONU estima en 14 anos a limpeza de bombas sen estoupar e cascallos en Gaza, 37 millóns de toneladas

A Xustiza belga cita Von der Leyen e o líder de Pfizer por presunta corrupción na compra de vacinas

A China reclama á OTAN que deixe de "desviar culpas" sobre Ucraína tras acusala de axudar a "inflixir máis morte e destrución en Ucraína"

O encontro da ALBA e a emergência da luta anti-imperialista

A Fiscalía reclama fechar a causa contra a parella de Sánchez por falta de indicios, tras unha denuncia baseada en acusacións de medios conservadores e de ultradereita

A Revolución dos Cravos fai medio século entre celebracións masivas por todo o territorio

Hamás deixará as armas ao crearse un Estado palestino independente e ofrece unha tregua de cinco anos con Israel