As autoridades palestinas informaron a primeira hora desta cuarta feira da morte da xornalista de Al Jazeera Shiriin abu Aklé a mans das forzas israelíes, que lle proferiron un disparo na cabeza na localidade cisxordana de Yenín.
A reporteira achábase nun campo de refuxiados cubrindo os enfrontamentos entre manifestantes palestinos e o Exército de Israel, que non dubidaron en abrir fogo tanto contra eses mozos como contra os equipos de prensa alí presentes, segundo a axencia de noticias Maan.
Os militares israelís xustificaron os disparos alegando que previamente "sospeitosos armados" abriran fogo contra eles. Porén, desde Al Jazeera non dubidan en responsabilizar Israel deste mortal ataque, que cualifica de "asasinato a sangue frío".
"Nun tráxico asasinato premeditado que viola as leis e normas internacionais, as forzas de ocupación israelís, a sangue frío, mataron a nosa reporteira Shirín abu Aklé", manifestou o medio de comunicación, que lamentou que este tipo de feitos buscan "impedir que a prensa faga o seu traballo".
"Queren silenciarnos, mais non o conseguirán", din desde 'Al Jazeera'
O director executivo do medio, Giles Trendle, asegurou que o equipo está "impactado e moi triste" polo sucedido en Cisxordania. "Como xornalistas, seguimos adiante; a nosa misión é facelo. Non seremos silenciados pese aos intentos de silenciarnos", apuntou.
Pola súa parte, o Goberno israelí asegurou que o Exército "está a investigar o ocorrido, en particular a posibilidade de que unha xornalista fose alcanzada por fogo real dun palestino", dixeron, se ben as imaxes difundidas nas últimas horas confirman a súa morte a mans das forzas de Israel.
"Como poden imaxinar, isto é un shock para os xornalistas que estiveron traballando con ela", sinalou Nida Ibrahim, unha compañeira súa sobre o terreo, correspondente que falou desde a cidade de Ramala, segundo informou Al Jazeera.
As forzas israelís están a intensificar os ataques nesta rexión. Arredor dunha trintena de palestinos morreron nos últimos días a mans de Israel e outros tantos foron detidos polas autoridades policiais no que denominan "operacións de contraterrorismo". Un mozo palestino de 18 anos foi asasinado tamén en Yenín hai escasos días.