Israel bombardea Gaza no marco da alza da violencia despois de 35 asasinatos de palestinos en xaneiro

As Forzas Armadas israelís lanzaron na madrugada da quinta feira unha nova vaga de ataques contra a Faixa de Gaza (Palestina) que causaron danos a varias vivendas e outras edificacións, informou WAFA, após soster Tel Aviv que se produciran varios disparos de foguetes en dirección a Israel, sen provocar vítimas de gravidade. “Cada segundo había bombardeos moi perto da miña casa”, denunciou Ahmed Abu Jarad, que vive cos seus tres fillos no campo de refuxiados situado no centro de Gaza, “o son das explosións é moi forte e sacude todo o lugar”, explicou en declaracións a Al Jazeera nas que definiu os bombardeos israelís como un “pesadelo”. A autoría dos disparos de foguetes desde Palestina foi reivindicado polos brazos armados de Hamás e da Fronte Democrática para a Liberación de Palestina, que os consideraron unha contestación á represión que están a sufrir os residentes en Cisxordania, que levan case un ano padecendo incursións practicamente diarias dos soldados israelís, e ao trato contra os prisioneiros palestinos nos cárceres de Tel Aviv. Estes ataques aéreos chegan no marco dunha escalada que supuxo a convocatoria hoxe dunha xuntanza do Comité Executivo da Organización para a Liberación de Palestina “para discutir vías que respondan á continuación da repunta das tensións por parte da ocupación”, apuntou Husein al Sheikh, secretario do órgano, que fixo fincapé na necesidade de frear a “política de desprazamento e apartheid” aplicada por Israel contra unha poboación palestina que está a sufrir “un masacre”, indicou. Escalada O incremento dun nivel de tensión xa alto na zona produciuse a semana pasada cunha incursión militar israelí no campo de refuxiados de Xinín (Cisxordania) a semana pasada na que os militares israelís asasinaron nove palestinos, ao que hai que engadir unha décima vítima mortal noutro ataque posterior. Até 35 palestinos -oito deles crianzas- morreron a mans das forzas de seguridade ou de colonos israelís en xaneiro de 2023, despois de que 2022 se convertera con máis de 200 asasinatos de palestinos, incluídos os de máis de 50 menores de idade, no ano máis sanguento na última década e media, produto tanto das incursións dos soldados no territorio palestino ocupado como da protección que brindan aos colonos cando atacan persoas ou propiedades palestinas. O ano pasado a Organización das Nacións Unidas contabilizou máis de 800 agresións por parte dos colonos. Despois da operación en Xinín, un palestino matou sete colonos israelís á porta dunha sinagoga en Xerusalén Leste, nun asentamento ilegal, o que foi seguido por outro ataque dun palestino de 13 anos que deixou dous feridos mais non falecidos. No plano institucional, o Executivo liderado por Benjamin Netanyahu en Israel e conformado por formacións de extrema dereita e ultra ortodoxas expulsou familiares dos atacantes palestinos das súas casas, que procedeu a demoler, quitoulles a cidadanía e beneficios sociais tamén a persoas achegadas, lanzou unha iniciativa para facilitar o acceso da poboación ás armas e legalizou aínda máis asentamentos -unha medida prometida antes da escalada-, que en todo caso seguen a ser ilegais baixo o dereito internacional. Entrementres, membros do Gabinete fixeron un chamamento a armarse e perseguir a poboación palestina, chegando a producirse centos de agresións nas primeiras horas segundo as estatísticas oficiais. Amais de incendiar unha vivenda e varios vehículos, un grupo de colonos chegou a construír unha edificación en terreos palestinos e atacar os propietarios cando chegaron. Acabar co apartheid Esta situación levou a Amnistía Internacional a pór o foco no “mortífero custo asociado ao sistema de apartheid en Israel”, solicitando á comunidade internacional que “elimine toda forma de apoio ás violacións de dereitos humanos de Israel, que rompa con anos de inacción cómplice e obrigue as autoridades israelís a render contas”, subliñou a secretaria xeral da entidade, Agnès Callamard. Ademais de insistir en que o apartheid é “un crime de lesa humanidade”, achacou á falta de presión internacional que Tel Aviv considere que “ten vía libre para segregar, controlar e oprimir a poboación palestina a diario e contribuír a xerar unha violencia mortal”. Unha das políticas israelís denunciada pola organización é a dos asentamentos ilegais en terras roubadas á poboación palestina, e que busca fragmentar o territorio para imposibilitar o futuro estabelecemento dun Estado palestino non ocupado. "Ningún Estado debería poder desacatar sistemática e impunemente o dereito internacional", asegurou Callamard, a pesar diso, un grupo a favor dos colonos destacou onte que en base aos datos oficiais máis de medio millón xa están asentados en Cisxordania, un aumento de 16% nos últimos cinco anos, ao que hai que engadir 200.000 colonos israelís en Xerusalén Leste. O grupo amosouse confiado de que co novo Goberno en Tel Aviv a expansión será aínda maior e máis rápida. A visita do Secretario de Estado de Washington, Antony Blinken, confirmou a denuncia de Callamard, pois amais de reafirmar a amizade con Israel, que ten aos Estados Unidos como o seu valedor, responsabilizou Palestina en maior medida pola escalada e premeu o presidente Mahmud Abbas para que reprima os grupos armados que loitan en contra da opresión israelí, advertindo que non haberá negociacións de ningún tipo neste contexto de escalada da violencia. Pola súa parte, Netanyahu foi máis aló e fechou a porta a conversas con Palestina até que “remate o conflito árabe-israelí”. Israel, a camiño dunha "ditadura" Para os cidadáns recoñecidos como tal no que se define como Estado “xudeu”, unha das principais preocupacións nas últimas semanas é o intento de Netanyahu de reformar o sistema xudicial, considerado polos seus adversarios políticos como “un golpe de Estado” ou a legalización dunha “ditadura”, o que incitou mobilizacións masivas en contra da norma. Netanyahu quere subordinar o Tribunal Supremo ao lexislativo ou ter maior capacidade de nomear xuíces, permitindo a presenza no Goberno de persoas condenadas e garantindo o seu futuro perante a súa imputación por corrupción.

Israel bombardea Gaza no marco da alza da violencia despois de 35 asasinatos de palestinos en xaneiro

Illa rexeita ser president cos votos do PP e reduce as opcións para dirixir a Generalitat a Aragonès ou Puigdemont

A ONU estima en 14 anos a limpeza de bombas sen estoupar e cascallos en Gaza, 37 millóns de toneladas

A Xustiza belga cita Von der Leyen e o líder de Pfizer por presunta corrupción na compra de vacinas

A China reclama á OTAN que deixe de "desviar culpas" sobre Ucraína tras acusala de axudar a "inflixir máis morte e destrución en Ucraína"

O encontro da ALBA e a emergência da luta anti-imperialista

A Fiscalía reclama fechar a causa contra a parella de Sánchez por falta de indicios, tras unha denuncia baseada en acusacións de medios conservadores e de ultradereita

A Revolución dos Cravos fai medio século entre celebracións masivas por todo o territorio

Hamás deixará as armas ao crearse un Estado palestino independente e ofrece unha tregua de cinco anos con Israel