Tanto fontes de Junts como do PSOE ratificaron hoxe a medios estatais que o acordo para que a forza catalá apoie a investidura de Pedro Sánchez (PSOE) a cambio da amnistía das e dos independentistas catalás represaliados está cada vez máis perto. Desde a formación estatal trasladaron que o máis probábel é que a sesión de investidura decorra a vindeira semana.
Hoxe producirase a quinta protesta en cinco días contra a sede do PSOE en Madrid, convocada por Solidaridad, un sindicato vinculado coa ultraespañolista Vox. A terza feira, nunha mobilización que, segundo a Delegación do Goberno estatal, contou con 7.000 persoas, houbo múltiples disturbios e enfrontamentos coas forzas de seguridade.
Nese sentido, a Policía española asegurou que está a investigar os grupos de extrema dereita.
Ademais, nun dos grupos de coordinación das protestas, múltiples persoas reclamaron o uso da violencia logo de que unha ex candidata de Vox, María Isabel Fernández, inquirira sobre as novas medidas a tomar incidindo en que “en Venezuela lanzábamos cócteles molotov” aos vehículos policiais.
