A guerra en Ucraína impide un acordo no cumio de ministras e ministros de Exterior do G20

A reunión de titulares de Asuntos Exteriores do G20, o foro que agrupa as economías máis grandes do planeta, fechouse onte na India, que ostenta a Presidencia rotatoria da institución, sen un acordo conxunto, do mesmo xeito que a reunión de ministras e ministros de Finanzas do organismo hai unha semana, nunha reunión que volveu estar marcada pola guerra en Ucraína. O papel central do conflito no debate foi cuestionado no inicio da reunión polo primeiro ministro da India, Narendra Modi, que tratou de que a cimeira se orientara cara ao desenvolvemento dos países máis empobrecidos ou ás estratexias para combater o cambio climático. "Non debemos permitir que problemas que non podemos resolver xuntos se interpoñan no camiño dos que podemos", ratificou, e reclamou que non se permita que a guerra acabe cos pactos noutros ámbitos. Ao tempo, instou a entidade a recoñecer que “o Goberno global fallou”, e puxo como exemplo “as experiencias dos últimos anos, crises financeiras, cambio climático, pandemia, terrorismo e guerras”, subliñando que son os países en desenvolvemento os que máis padecen as consecuencias, loitando contra unha débeda insostíbel mentres intentan garantir a seguridade alimentaria e enerxética dos seus pobos. A pesar da ausencia dun acordo conxunto, foi emitido un resumo dos temas abordados no que se puideron conciliar as posicións de todas as partes en todos os asuntos excepto Ucraína, destacou Subrahmanyam Jaishankar, ministro de Exteriores indio, que incidiu en que o cumio non se pode considerar un fracaso. Entre os pactos alcanzados está profundar na cooperación no ámbito da seguridade alimentaria, reafirmar a loita para alcanzar os obxectivos de quecemento global marcados pola Organización das Nacións Unidas, ou admitir a necesidade de dar prioridade á consecución da igualdade de xénero. Á vez, lembra o acordo da cimeira en Indonesia de 2022 para que os países máis desenvoltos aumenten os investimentos “para non deixar ninguén atrás”. Entrementres, no que atinxe á invasión rusa, o documento apunta que a maioría dos membros a condenaron e recolle que “houbo outras valoracións da situación e das sancións”. Amais, o ministro de Asuntos Exteriores ruso, Sergei Lavrov, departiu arredor de 10 minutos co seu homólogo estadounidense, Antony Blinken. Funcionarios dos Estados Unidos trasladaron a Reuters que Blinken lle solicitou que reconsideren a súa posición acerca do Novo Start e sinalou que manterían o apoio a Ucraína indefinidamente. Pola contra, a voceira de Asuntos Exteriores de Rusia, Maria Zajarova, sostivo que falaron en “movemento” a petición de Washington e que non mantiveron nin unha reunión nin negociacións, cita Tass. Críticas a Rusia Outros países da Organización do Tratado do Atlántico Norte (OTAN) como Alemaña tamén criticaron Moscova no cumio. A ministra de Exteriores alemá, Annalena Baerbock, cuestionou como “afirmacións falsas” que Rusia “non comezou a guerra ou que o agravamento da crise alimentar é culpa de outros”. Pola súa parte, Lavrov indicou que os Estados da alianza militar converteron a xuntanza “nun circo, intentando endosar a responsabilidade polos seus fallos en política económica”, e fixo fincapé en que a Unión Europea está a acaparar o gran ucraíno exportado polo mar Negro e bloquea nos seus portos “cargas de doazóns de fertilizantes rusos, en particular para África”. En paralelo, denunciou que a OTAN poña en cuestión a invasión en Ucraína, que sostivo busca protexer a súa seguridade nacional, despois de protagonizar “aventuras ilegais” en Iugoslavia, o Iraq, Libia ou Siria, que non representaban “ameaza algunha” e están a milleiros de quilómetros dos Estados Unidos. Negociacións de paz No caso da China, “sempre estará do lado da paz, promoverá activamente negociacións pola paz e xogará un rol construtivo”, subliñou Qin Gang, o titular de Asuntos Exteriores, antes de defender que “ninguén debería participar na confrontación de bloques”, polo que apelou á Iniciativa de Seguridade Global e á proposta de paz chinesa para Ucraína, presentadas a semana pasada. Nese sentido, o chanceler alemán, Olaf Scholz, reiterou desde Berlín a mensaxe reproducida polos membros da OTAN desde que se fixo inminente a proposta de paz chinesa, alertando da posibilidade de que Beijing venda armamento letal a Moscova para a guerra e pedindo que “non dean armas á Rusia agresora”, algo negado pola China, que censura esas peticións cando a OTAN enviou máis de 60.000 millóns de euros en armas a Kíiv. Arredor deste asunto, precisamente onte os Estados Unidos aprobaron unha venda de armas a Taiwán -que para a China é unha rexión autónoma- de case 600 millóns de euros para que manteña “unha capacidade suficiente de autodefensa”. Os EUA intervirán cando queiran en Afganistán Sen saír de Washington, o informe anual do seu Exército no estranxeiro explica que os Estados Unidos poderán intervir de forma militar en Afganistán cando o consideren, aludindo a unha autorización do Goberno deposto polos talibán en 2021. A este respecto, o profesor de Relacións Internacionais en Harvard, Stephen M. Walt, incidiu tras participar na Conferencia de Seguridade de Múnic en que o motivo polo que ningún país fóra da OTAN e dos seus aliados sancionou ou armou Ucraína é que “na súa opinión, non só as potencias occidentais fan a maioría das regras, senón que tamén están perfectamente dispostas a violar estas regras sempre que lles conveña”, polo que negan que institucións como a alianza militar representen os seus intereses, o que “significa que a fenda entre Occidente e o chamado resto do mundo non é probábel que desapareza”. Moscova denuncia un ataque terrorista Dmitri Peskov, voceiro do Kremlin, cualificou de “ataque terrorista” a incursión de “sabotadores ucraínos” en dúas localidades rusas fronteirizas con Ucraína. Moscova sinalou que dous civís faleceron e que a unha crianza ferida foille extraída unha bala procedente dunha arma da OTAN. As autoridades ucraínas negaron a súa responsabilidade e comunicaron que catro persoas morreron en Zaporijia a causa dun bombardeo ruso. No plano militar, aumentan as voces gobernamentais que adiantan a retirada de Bakhmut.