O gasto militar rompe marcas mentres Europa volve a niveis da Guerra Fría

Os Estados Unidos, a China e Rusia representaron 56% do gasto militar no mundo en 2022, revela o informe publicado a segunda feira polo Instituto Internacional de Estudos para a Paz de Estocolmo (Sipri), que conclúe que o pasado ano o gasto en Defensa elevouse 3,7% en termos reais -6,5% sen axustar a inflación-, impulsado por un incremento en Europa de 13%. Estes datos confirman que foi o oitavo exercicio consecutivo no planeta no que aumentou o gasto militar, algo que acontece en todos os continentes agás África, que reduciu o seu investimento 5,3%. Porén, tamén se produciu unha diminución en zonas como Suramérica, Centroamérica e o Caribe, Asia Central e o sueste asiático. No que atinxe aos Estados Unidos, o Sipri explica que o aumento de 0,7% en termos reais no gasto militar tería sido maior de non coincidir cos niveis máis altos de inflación no país desde 1981. Así e todo, os case 800.000 millóns de euros dedicados a gasto militar por Washington supoñen arredor de 40% deste gasto en todo o mundo, e unha cifra semellante á dos dez países que máis gastan neste eido sen contar os Estados Unidos, que alcanzan 3,5% do produto interior bruto (PIB) outorgado a Defensa. Nese sentido, o segundo país da lista, a China, cun incremento de 4,2% fica en 265.000 millóns de euros, adicando 1,6% do seu PIB, ao tempo que en Rusia se rexistrou unha alza de 9,2% o pasado ano até os 78.000 millóns de euros, que supón 4,1% do seu PIB. Tamén se detectaron fortes alzas de gasto militar na India e Arabia Saudita, cuarto e quinto Estado que máis cartos empregan. Nova Deli protagonizou unha suba de 6% até 74.000 millóns de euros e Riad de 16% até 68.000 millóns de euros, no marco da súa implicación na guerra do Iemen e antes de resolver que era hora de acabar co conflito, como amosan as negociacións en Saná. Após o Reino Unido, Alemaña, Francia, Corea do Sur e o Xapón aparece Ucraína no 11º posto, ao incrementar 640% o seu gasto militar por mor da invasión rusa, o que supón 34% do seu PIB e representa a alza máis alta rexistrada polo Sipri nun só ano. Á respecto do Estado español e Portugal, Lisboa non aparece na relación dos 40 Estados que máis dedican a gasto militar, namentres Madrid queda na 16ª posición con máis de 18.000 millóns de euros, tras unha suba de 7,3%, afectando 1,5% do PIB. Entre os primeiros 20 países que máis gastan en Defensa o investimento só se reduciu en 2022 comparado con 2021 en Corea do Sur, Italia, Israel e o Brasil. Amais de Ucraína, o outro Estado no que se disparou o gasto militar en 2022 foi Etiopía, ao medrar 88% até máis de 900 millóns de euros, o que se explica pola guerra entre o Estado e a rexión de Tigrai, no norte etíope, que acabou despois de asinarse un acordo de paz o pasado novembro. Do lado contrario, Turquía reduciu as partidas de Defensa 26%, unha diminución que se produce por terceiro ano consecutivo, á vez, Nixeria baixou 38% o gasto militar, mais despois de elevalo 56% en 2021. “Os Estados están a reforzar a súa forza militar en resposta a unha contorna de seguridade en deterioración”, subliñou o investigador principal do Programa de Produción de Armas e Gasto Militar do Sipri, Nan Tian, que incidiu en que “o aumento continuo do gasto militar mundial nos últimos anos é un sinal de que vivimos nun mundo cada vez máis inseguro”. Tensións no Indo-Pacífico O Sipri fai fincapé no aumento de 5,9% do gasto militar no Xapón até 42.000 millóns de euros ou 1,1% do PIB, o nivel máis alto desde 1960, apunta o informe, que o vincula co impulso ao rearme do país. “As restricións que o Xapón impuxo na posguerra ao seu gasto militar e capacidades militares semellan estar a ser afrouxadas”, sostivo Xiao Ling, investigador da entidade. Isto acontece cando Toquio se enfronta con Beijing pola soberanía de illas no nordés de Taiwán e con Moscova polo arquipélago das Kuriles, no norte xaponés. Outro tanto programa Australia, que presentou a segunda feira a reforma das súas Forzas Armadas tras os acordos con Estados Unidos e o Reino Unido para dispor de submarinos de propulsión nuclear, após apenas subir un gasto en Defensa que alcanza 30.000 millóns de euros. Para xustificar a decisión, foi divulgada unha revisión da súa estratexia de Defensa na que se recoñece que o seu Exército non está "totalmente apto" para defender o país, e destaca que Washington “xa non é o líder unipolar do Indo-Pacífico”, polo que percibe “unha gran competencia de poder estratéxico” que “debe verse como a característica definitoria da nosa época e da nosa rexión”. Así e todo, o descenso de 4% no gasto militar nos países do sueste asiático, que asumen 1.9% do gasto militar mundial, nos que tamén hai disputas pola soberanía das illas do mar da China Meridional entre a China, Filipinas, Vietnam ou Malaisia, reflicte que a pesar do aumento das tensións na zona son apenas as principais potencias a nivel militar as que as traducen nun incremento de gasto dirixido ás súas Forzas Armadas. A OTAN, máis da metade do gasto militar mundial A Organización do Tratado do Atlántico Norte (OTAN) representou 55% do gasto militar no mundo en 2022, cun aumento de 0,9% até 1,2 billóns de euros. Aínda así, membros da alianza militar liderada polos Estados Unidos pulan por aumentar até 2,5% a porcentaxe do PIB en gasto militar exixido aos Estados adheridos. Algo que -deixando fóra Washington- só cumpre Grecia (3,7%) e Lituania (2,5%) e se achegan o Reino Unido (2,2%), o segundo país europeo que máis gasta, e Polonia (2,4%). En todo caso, aínda que a OTAN pide un maior investimento militar as cifras do Sipri amosan como o gasto militar en Europa Central e Occidental superou por primeira vez os datos de 1989, ao final da Guerra Fría, con fortes aumentos en Finlandia (36%), Lituania (27%), Suecia (12%) e Polonia (11%), algo que o Sipri atribúe á invasión rusa de Ucraína, que tería provocado “un impacto inmediato nas decisións sobre o gasto militar”, asevera Lorenzo Scarazzato, investigador da entidade sueca. Ucraína Ao respecto dos envíos de armamento a Ucraína, o Sipri apunta que só os máis de 18.000 millóns de euros remitidos en armas polos Estados Unidos en 2022 supoñen “a maior doazón de axuda militar dun país a outro en calquera ano desde a fin da Guerra Fría”.