O G7 promete apoio a longo prazo a Ucraína tras frear a OTAN a adhesión de Kíiv

O G7, conformado polos Estados Unidos, Alemaña, o Canadá, o Xapón, Italia, Francia e o Reino Unido, acordou a cuarta feira “iniciar negociacións con Ucraína para formalizar, mediante compromisos e acordos bilaterais de seguridade aliñados con este marco multilateral [...], o noso apoio duradeiro a Ucraína”, na última xornada da cimeira anual da Organización do Tratado do Atlántico Norte (OTAN) en Vilnius, Lituania. Esta colaboración, que duraría até un potencial ingreso de Ucraína na OTAN, pretende “garantir unha forza sostíbel capaz de defender Ucraína agora e disuadir a agresión rusa no futuro”, e incluiría equipo militar avanzado, avións de combate, vehículos blindados ou Intelixencia. O documento pactado polo G7 subliña que procurarán intensificar a interoperatividade do Exército ucraíno co dos membros da OTAN, así como apuntalarán a súa economía e apoiarán as reformas precisas para as súas “aspiracións euroatlánticas”. Tamén aborda un hipotético futuro ataque ruso, concordando que “consultarán de forma inmediata Ucraína para determinar os pasos a seguir”. Asemade, defenden a imposición de sancións coercitivas e a conxelación de bens rusos “até que Rusia pague polos danos que causou a Ucraína”. O presidente de Ucraína, Volodimir Zelenski, destacou que o acordo do G7 xera “garantías de seguridade” para o país, nunha terminoloxía repetida polos medios occidentais. O pacto do G7 replica o compromiso de profundar no apoio a Kíiv por parte da OTAN, que engloba a creación do Consello OTAN Ucraína. Entrementres, o mandatario estadounidense, Joe Biden, reiterou que o entendemento é unha “poderosa declaración do noso compromiso con Ucraína”, despois de facer fincapé con anterioridade en que o modelo de apoio estadounidense a Israel -que máis alá do envío de armamento tamén ten unha veta política- sería a base para o texto adoptado polo G7. Amais dos integrantes do G7, anunciaron que se sumaban á declaración o Estado español, Portugal, Países Baixos, Chequia, Islandia, Dinamarca, Polonia e Noruega. A OTAN frea a adhesión de Ucraína entre críticas de Kíiv Este compromiso prodúcese un día despois de que a OTAN resolvera non desenvolver un calendario para a adhesión de Ucraína á alianza militar liderada por Washington, delimitando que o convite de acceso se remitirá “cando os aliados estean de acordo e se cumpran as condicións”, o que foi cuestionado por Ucraína criticando que a OTAN busca deixar a pertenza de Kíiv á entidade ao abeiro de negociacións futuras con Rusia. En todo caso, Jake Sullivan, asesor de seguridade nacional de Biden, recalcou que aceptar a incorporación de Ucraína á OTAN “significaría a guerra con Rusia”, á vez que Dmitri Medvedev, vicepresidente do Consello de Seguridade de Rusia, mantivo que o aumento da axuda da alianza militar a Ucraína achega a posibilidade dunha Terceira Guerra Mundial. Ademais, medios especializados inciden en que a posición da alianza militar con respecto a Kíiv virá determinada polo resultado da contraofensiva militar ucraína, que de fracasar levaría a que a OTAN premese Ucraína para negociar a fin da guerra con Rusia, o que implicaría tamén a redución dunha axuda que supera os 170.000 millóns de euros desde a invasión, a maioría en armamento. Zelenski ratificou esta situación, admitindo que é consciente de que a axuda militar "depende do que suceda no campo de batalla". Unha vez asinado o acordo do G7 con Ucraína, un funcionario dos Estados Unidos trasladou a Reuters que comezarán en breve a negociar con Kíiv un pacto bilateral, e Alemaña confirmou que entregará 12.000 millóns de euros en armas a Ucraína até 2032, incluíndo 3.200 millóns de euros neste exercicio. A resposta de Moscova chegou de parte do voceiro do Kremlin, Dmitri Peskov, que asegurou que “este movemento é un grave erro e potencialmente moi perigoso”, ao afectar “a seguridade de Rusia”. “Ao tomar tal decisión, estes países farán que Europa sexa moito máis perigosa durante moitos anos”, concluíu. Nesa liña, o ministro de Asuntos Exteriores ruso, Sergei Lavrov, acusou a “colectividade occidental liderada polos Estados Unidos” de loitar por “manter a súa hexemonía nos asuntos mundiais”, após criticar en diversas ocasións a extensión da OTAN cara ao leste tras comprometerse a frear a súa expansión. Bombas de acio Arredor do envío de bombas de acio a Ucraína anunciado polos Estados Unidos, o primeiro ministro do Canadá, Justin Trudeau, proclamou o rexeitamento de Otava a esta tecnoloxía, pondo o foco en que o país americano “liderou a retirada deste tipo de armamento en todo o mundo”, e que xa foi prohibido por máis de 120 Estados polo seu efecto indiscriminado entre a poboación civil. Biden xustificou a medida en que os militares ucraínos “están a quedar sen munición”. Ao respecto, o ministro de Defensa de Rusia, Sergei Shoigu, alertou que se finalmente se concreta o envío de bombas de acio estadounidenses a Kíiv “as Forzas Armadas rusas veranse obrigadas a utilizar armas similares contra as forzas ucraínas”. Londres pide gratitude a Zelenski polo envío de armas O ministro de Defensa do Reino Unido, Ben Wallace, insistiu a cuarta feira en que “nos guste ou non, a xente quere ver un pouco de gratitude” por parte de Ucraína, despois de que Londres entregara máis de 10.000 millóns de euros en axuda e das palabras na xornada anterior de Zelenski, que definiu como “absurdo” que non lle ofreceran unha data para entrar na OTAN. Wallace explicou que hai que ter en conta que “ás veces pides aos países que renuncien ás súas propias existencias [de armas]", así como que "ás veces hai que persuadir os lexisladores” dos Estados Unidos, confirmando que o ano pasado dixo a Ucraína que “non somos Amazon”, tras conducir "11 horas para que me deran unha lista". O propio Zelenski contestou á Wallace reiterando que “estamos agradecidos co Reino Unido”. Suecia entrará no outono na OTAN A pesar das especulacións de que os lexislativos turco e húngaro -os únicos que restan por facelo- aprobarían pronto a adhesión de Suecia á OTAN, unha vez que a segunda feira o presidente turco, Recep Tayyip Erdogan, ergueu o veto que mantiña á entrada de Estocolmo na alianza militar, Erdogan atrasou esa posibilidade aseverando que o proxecto de lei non se presentará ao Parlamento turco até o outono.