Hai tamén informacións confusas sobre o número de vítimas mortais en confrontos entre opositores e as forzas de seguranza. Organizacións como a Comisión Interamericana de Dereitos Humanos (CIDH) falan de 16 mortos, en tanto que o Observatorio Venezuelano de Conflitividade Social rebaixa a cifra a 13.
As fontes oficiais, da Fiscalía, poñen o foco nos confrontos entre opositores e chavistas en que non se produciu ningunha intervención da policía. Tamén en saqueos que resultaron en vítimas—fálase de catro mortos—, uns feitos que se están a investigar no estado de Bolívar.
Canto á evolución da situación, todos os ollos están postos nas forzas armadas do país e nese sentido todos os indicios apuntan a que se manteñen fieis á orde constitucional.
Na súa conta twitter, o ministro de Defensa, Vladimir Padrino, afirmou: "O desespero e a intolerancia atentan contra a paz da nación. Os soldados da patria non aceitamos un presidente imposto á sombra de escuros intereses nin autoproclamado á marxe da lei".
A posición de China
E na esfera internacional o movimento de maior impacto é o realizado por China. Baixo a dirección de Xi Jinping, o xigante asiático distánciase do perfil baixo que o país adoptou no pasado perante conflitos semellantes e deixa ver con clareza que está a carón de Maduro.
A través da portavoz do ministerio de Asuntos Exteriores, Hua Chunying, Beijing condena a "intrusión" dos EUA na política venezuelana e manifesta o seu apoio "aos esforzos do Goberno de Venezuela para manter a súa soberanía, independencia e estabilidade".
