O Exército de Liberación de Colombia anuncia un cesamento do fogo bilateral

O Exército de Liberación (ELN) de Colombia, informou que a partir desta quinta feira iniciará un cesamento do fogo bilateral, nacional e temporal, co Goberno que encabeza o presidente Gustavo Petro.

O primeiro comandante do ELN, Antonio García, deu a coñecer un comunicado do Comando Central con tres ordes que executarán os insurxentes como parte do cesamento do fogo bilateral.

O ELN detallou que a partir desta quinta feira, as súas estruturas deben cesar todas as operacións ofensivas contra as forzas militares e policiais a escala estatal, incluíndo as accións de intelixencia. Por outra parte, estas medidas estenderanse, segundo informou o ELN, até o próximo 3 de agosto.

Ademais, o grupo ordenou ás súas unidades "manter activados todos os dispositivos de defensa e seguridade para responder a ameazas ou ataques de calquera estamento ou grupo armado" contra as súas unidades ou contra a poboación civil.

A terceira orde do ELN foi o mandato de que a Xestoría de Paz quedará habilitada como ligazón de comunicación co Executivo "para informar sobre novidades que poidan presentarse relacionadas co cesamento do fogo".

Sesións de traballo

As delegacións do Goberno e do ELN informaron hai semanas de que, desde o pasado 20 de xuño, realizan tanto na Habana, a capital de Cuba, como en Bogotá, a de Colombia, sesións de traballo para preparar os protocolos sobre os acordos relacionados á participación da sociedade no proceso de paz e o cesamento do fogo.

Ambas as delegacións sinalaron que as sesións de traballo realízanse "en cumprimento" da "actividade permanente" da Mesa de Diálogos de Paz e dos Acordos de Cuba, asinados o pasado 9 de xuño. Ademais, adiantaron que estas xornadas culminarán xustamente esta quinta feira, 6 de xullo.