Os dereitos laborais dos menores, en risco nos Estados Unidos

Nas últimas semanas, varios informes de distintos organismos comezaron a alertar do cambio de tendencia na aplicación da lexislación contra o traballo infantil nos Estados Unidos de América (EUA). Algúns Estados están a cambiar as leis que prohiben e regulan o traballo de menores, o que podería ter consecuencias fatais para os seus dereitos. En concreto, nos últimos dous anos, un total de dez Estados nos EUA teñen aprobado emendas á lexislación anterior, o que é especialmente preocupante se se considera que as violacións relacionadas co traballo infantil van en aumento nos últimos tempos: un 37% no último ano, segundo un informe do Instituto de Política Económica que data do mes de marzo. Nebraska, Ohio, Minnesota, Arkansas, Missouri, Iowa e Dakota do Sur son algúns dos Estados que nos últimos meses teñen aprobado distintas medidas lexislativas para rebaixar as restricións impostas ao traballo infantil pola normativa federal, incluíndo o visto bo para que os menores traballen no sector da construción. Porén, non son os únicos. Industria agrícola e alimentaria En febreiro, o departamento de Traballo dos Estados Unidos denunciou –a raíz dunha investigación aínda en curso– que unha grande empresa do sector alimenticio tiña máis de 100 menores de idade traballando en situación ilegal en 13 instalacións distribuídas por todo o país. Os traballos reservados para os nenos eran, ademais, perigosos para a saúde: varios deles sufriron feridas derivadas das súas ocupacións. Nos Estados Unidos as leis federais prohiben o traballo de menores de 14 anos en ocupacións fóra do sector da agricultura, ao mesmo tempo que regulan os tipos de traballo, as horas que poden traballar os menores de 16 e a súa retribución. Por descontado, os postos de traballo considerados perigosos ou de risco están prohibidos para todos os menores de idade. Medio millón de crianzas traballan na industria agrícola cada ano, onde se rexistra a metade das mortes laborais xuvenís O sector agrícola está regulado de forma distinta: permítese o traballo de menores de idade durante xornadas indefinidas, sempre que a tempada non coincida co ano escolar. Calcúlase que medio millón de nenos traballan na industria agrícola cada ano. A metade das mortes laborais xuvenís ocorren neste ámbito. A lexislación contra o traballo infantil existe para protexer os dereitos da infancia, a seguridade física dos menores e o seu dereito a ter oportunidades educativas que non se vexan minguadas por prácticas laborais. Porén, as industrias estadounidenses de manufacturas e procesamento cárnico –entre outras– están a rexistrar datos cada vez máis desacougantes no que á vulneración dos dereitos da infancia se refire. Unha parte dos menores que están empregados nesta clase de instalacións por todo o país son o que se denomina "menores non acompañados", é dicir, fillos de migrantes ilegais que, por unha ou outra circunstancia, quedaron separados das súas familias. Isto revela unha nova faceta da problemática: a explotación de minorías vulnerables, como son os migrantes ou os peticionarios de asilo. Industria automobilística Outro caso rexistrado é o das cadeas de loxística da Hyundai-Kia no Estado de Alabama, onde se atoparon casos de nenos de 14 anos traballando para as automobilísticas. Moitos destes menores eran fillos de inmigrantes procedentes de Guatemala. As autoridades que investigan feitos similares sospeitan da implicación de bandas criminais dedicadas ao tráfico e á trata. Renomeadas cadeas de comida rápida tamén se atopan baixo escrutinio: McDonald's, Chipotle ou Dunkin' Donuts son algunhas. Os argumentos dunha parte dos empresarios radican na escaseza de traballadores naqueles sectores que dependen máis directamente do traballo xuvenil. Porén, a resposta non debería ser o empeoramento das condicións laborais. A xuventude migrante non acompañada é especialmente vulnerable, debido ao fracaso do sistema de inmigración estadounidense. Estímase que, unicamente en 2022, uns 130.000 menores chegaron á fronteira sur dos Estados Unidos, tentando fuxir de países nos que o panorama de seguridade non lles permitía levar unha vida digna. Recentemente, a Administración Biden anunciou a próxima creación dunha axencia especial para perseguir esta clase de delitos relacionados co traballo infantil. Así mesmo, o director da Coalición do Traballo Infantil, Reid Maki, declarou para o diario The Guardian que "estas leis están mal aconselladas e están a buscar un impacto negativo nos resultados académicos dos rapaces".