Comeza o proceso na Corte Internacional de Xustiza: Suráfrica acusa Israel de xenocidio en Gaza

Os procedementos ante a Corte Internacional de Xustiza (CIX) pola demanda presentada por Suráfrica contra Israel por "xenocidio" no marco do asedio e do ataque militar que está a perpetrar sobre a Faixa de Gaza arrancaron esta quinta feira na cidade neerlandesa da Haia. O proceso deu comezo despois da entrada no hemiciclo da CIX da xudicatura e das delegacións de Suráfrica e Israel, tras o que o equipo surafricano presentou os seus argumentos, mentres que o israelí fará o propio esta sexta feira. A presidenta do organismo, Joan Donoghue, presentou ao inicio dos procedementos os letrados que representarán Suráfrica e Israel, Dikgang Ernest Moseneke e Aharon Barak, respectivamente, quen presentaron xuramento ante o tribunal. O equipo surafricano lembrou que o Estado que representan resaltou na petición de "medidas provisionais" contra Israel que "recoñece a 'Nakba' [éxodo forzoso] en marcha do pobo palestino a causa da colonización de Israel desde 1948, que o desposuíu, desprazou e fragmentou de maneira sistemática e forzosa". "Temos en conta particularmente o réxime institucionalizado de leis discriminatorias, políticas e prácticas deseñadas e mantidas para estabelecer dominación e someter ao pobo palestino a un 'apartheid' [sistema de segregación] a ambos lados da Liña Verde [fronteira non oficial que separa Israel e Palestina]", resaltaron os letrados. "Unha impunidade desde hai décadas ante unhas violacións dos Dereitos Humanos xeneralizadas e sistemáticas reforzou Israel na súa intensificación dos crimes internacionais en Palestina", incidiu o equipo legal. Galiza, máis solidaria após tres meses de resistencia palestina contra o xenocidio Neste sentido, fixo fincapé en que "os actos xenocidas e as omisións por parte de Israel forman parte inevitábel dun 'continuum' de actos ilegais perpetrados contra o pobo palestino desde 1948" e agregou que "son parte do contexto amplo dos 75 anos de 'apartheid', dos 56 anos de ocupación, así como dos 16 anos de cerco á Faixa de Gaza". Na súa demanda, Suráfrica sostivo que "Israel participou, está participando e corre o risco de seguir cometendo actos xenocidas contra o pobo palestino en Gaza" e afirmou que estas accións son levadas a cabo "coa intención específica de destruír aos palestinos como parte dun grupo nacional, racial e étnico". "A día de hoxe, 1% da poboación palestina foi decimada en Gaza", afirmou esta quinta feira Tembeka Ngcukaitobi, membro do equipo surafricano, en referencia ás mortes palestinas na intervención militar que actualmente desenvolve Israel sobre a Faixa. "Líderes israelitas e xenerais do Exército expresaron a súa intención xenocida", afirmou. Neste sentido, lembrou declaracións de líderes de Israel, como o ministro de Defensa, Yoav Gallant, cando dixo que combaten "contra animais humanos". "A intención articulada é a destrución da vida palestina en todas as súas manifestacións", apuntou Ngcukaitobi, que abundou en que "Israel é consciente da súa destrución da vida e infraestrutura palestina, pese ao cal mantivo e intensificou as súas actividades en Gaza". 2023 remata coas palestinas e palestinos de Gaza "convertidos en ósos" Adila Hassim, tamén do equipo surafricano, dixo esta quinta feira que a primeira acción xenocida de Israel é "o asasinato en masa de palestinos en Gaza" e recalcou que 70% das máis de 23.300 persoas falecidas na ofensiva israelita son "mulleres e crianzas". "Xunto ao desprazamento forzoso, a conduta de Israel é deliberada para causar a morte por fame. A evacuación forzosa é en si xenocida, e será permanente, de forma inevitábel, non teñen unha casa onde volver", sinalou. "Os xenocidios nunca son declarados por adiantado, mais este tribunal ten o beneficio das probas durante as últimas 13 semanas, que mostran de forma irrefutábel un patrón de conduta e intención relacionada que xustifica unha denuncia plausíbel por actos xenocidas", concluíu. Por isto, Suráfrica pediu á CIX medidas provisionais para garantir protección á poboación palestina contra danos "severos e irreparábeis" aos seus dereitos en virtude da Convención sobre o Xenocidio, tras o que Israel asegurou que se defendería das acusacións do que describiu como "unha inxuria de sangue". Galiza mantén o seu apoio a Palestina exixindo cese do fogo e fin do xenocidio: "Israel é un Estado xenocida e terrorista" Resposta de Israel O primeiro ministro de Israel, Benjamin Netanyahu, asegurou que o caso presentado por Suráfrica é "unha demostración histórica de hipocrisía". "Unha organización terrorista leva a cabo o peor crime contra o pobo xudeu desde o Holocausto, e agora vén alguén que os defende en nome do Holocausto. Que descaro", aseverou Netayanhu. Neste termos se manifestou o mandatario israelí sen reparar nas máis de 23.300 mortes producidas pola intervención israelita sobre a Faixa de Gaza, ao que se suman os máis de 325 falecementos en operacións das forzas de Israel e nos ataques por parte de colonos en Cisxordania e Xerusalén Leste. "Seguiremos protexendo o noso xusto dereito a defendernos", remarcou. Outros Estados poderían sumarse a esta causa. Neste sentido, a viceprimeira ministra de Bélxica, Petra de Sutter, avogou por seguir os pasos de Suráfrica. Xordania, pola súa parte, adiantou que achegará "estudos e argumentos legais para apoiar a demanda". Estados como Irlanda, Colombia, Turquía, Malasia, o Brasil e Bolivia tamén apoiaron claramente o procedemento aberto ante a CIX. Pola súa parte, o secretario de Estado dos EUA, Antony Blinken, afirmou que acusar Israel de xenocidio "carece de fundamento" e cualificou a petición de Suráfrica de "particularmente irritante". Israel asasinou 142 cooperantes e máis de 107 xornalistas en Palestina desde o 7 de outubro