A China sitúa o "multilateralismo" como chave para alcanzar a paz no mundo

Entre as críticas dos países occidentais á neutralidade chinesa na guerra de Ucraína, o Ministerio de Asuntos Exteriores do país asiático presentou unha ambiciosa proposta recollida a cuarta feira polos medios internacionais para “eliminar as causas profundas dos conflitos, fomentar os esforzos internacionais conxuntos para achegar máis estabilidade e certeza a unha era volátil e cambiante e promover a paz e o desenvolvemento duradeiro no mundo”. Poucos días antes de que o presidente Xi Jinping inste a organizar negociacións de paz en Ucraína segundo Bloomberg, a Iniciativa de Seguridade Global propón un marco internacional baseado en seis principios “fundamentais” para a diplomacia chinesa. Entre eles, destaca “o compromiso de respectar a soberanía e a integridade territorial de todos os países”, apuntando que “todos os países, grandes ou pequenos, fortes ou débiles, ricos ou pobres, son membros iguais da comunidade internacional”, polo que censura as inxerencias externas e reitera que “debe ser respectado o seu dereito a elixir de forma independente os sistemas sociais e as vías de desenvolvemento”. Ao tempo, indica que “as preocupacións de seguridade lexítimas e razoábeis de todos os países deben tomarse en serio e abordarse debidamente”, facendo fincapé en que as diferenzas deben resolverse de maneira pacífica por medio do diálogo, polo que critica o abuso das sancións por “non resolver un problema, senón que crea máis dificultades e complicacións”. A China marca como referente principal a nivel internacional a Organización das Nacións Unidas (ONU), sinalando que a “mentalidade de Guerra Fría, o unilateralismo, a confrontación de bloques e as loitas pola hexemonía contradín o espírito” da carta fundacional da ONU, polo que reclamou “un verdadeiro multilateralismo” e defender a institución como a “principal plataforma para o Goberno da seguridade global”. Para levar á práctica estes obxectivos, o país salienta a súa disposición a efectuar “unha cooperación de seguridade bilateral e multilateral con todos os países e organizacións internacionais e rexionais”, participando de forma activa na proposta dunha Nova Axenda de Paz do secretario xeral da ONU, António Guterres. Beijing subliñou a importancia de aproveitar para este fin movementos de integración como a Organización de Cooperación de Shanghai ou o Brics, amais de reivindicar o apoio para a Asociación de Nacións do Sueste Asiático, a Unión Africana, a Liga Árabe ou a resolución da Comunidade de Estados Latinoamericanos e Caribeños na que define a área política como Zona de Paz. No que atinxe ás grandes potencias, a China solicita unha convivencia pacífica desde a perspectiva dunha colaboración que beneficie a todas as partes, e fai un chamamento “a que dean exemplo honrando a igualdade, a cooperación, o Estado de dereito, o cumprimento da Carta das Nacións Unidas e o dereito internacional”. A proposta chinesa publicouse no contexto da polarización cada vez máis grande que se está a producir no seo da Organización do Tratado do Atlántico Norte (OTAN) contra a China, como amosa a polémica polo globo chinés detectado nos Estados Unidos (EUA), que Washington derrubou tras cualificalo de aparato de espionaxe, ou as advertencias no caso de que Beijing venda armamento letal a Moscova. Reunión sino-rusa A este respecto, o titular de Asuntos Exteriores, Wang Wenbin, explicou a posición chinesa como “simplemente o fomento das conversas de paz”, cita AP, tras insistir en que “son os EUA quen segue a proporcionar armas ao campo de batalla, non a China”. Neste marco e após considerar a OTAN a Beijing como “un desafío”, a China está a estreitar os lazos cos seus aliados, o primeiro deles Rusia. Arredor desa cuestión, o xefe da diplomacia do Partido Comunista chinés, Wang Yi, reuniuse a cuarta feira co ministro de Asuntos Exteriores ruso, Sergei Lavrov, antes de xuntarse co presidente do país, Vladimir Putin. Alí, Wang pediu un “esforzo de paz” para resolver o conflito en Ucraína, recolle o South China Morning Post, e sostivo que profundarán na súa “cooperación estratéxica” de forma independente aos cambios “da tormenta internacional”, nunha relación bilateral que insistiu, nunca se “dirixe contra terceiros países”, pero tampouco acepta a inxerencia deses actores. Ademais, puxo o foco en que a alianza entre ambos se fundamenta no “auténtico multilateralismo” e na “democratización das relacións internacionais”, algo no que lles apoian “moitos países de África, América Latina e Asia”. Pola súa parte, Putin indicou que a cooperación mutua é de grande importancia para estabilizar a situación internacional, sinalou Tass, informando de que o obxectivo de elevar en 2024 o comercio bilateral a 190.000 millóns de euros será cumprido antes. Á vez, asegurou que a visita de Xi a Rusia, adiantada por medios internacionais, suporá un “novo impulso” ao desenvolvemento conxunto. Precisamente a alianza coa China está a permitir a Rusia capear os efectos das sancións occidentais vendo máis cara a Asia que a Europa, o que xa converteu Beijing no maior comprador de petróleo ruso, constata Nikkei Asia. Biden considera un "erro" a retirada rusa do Start III Desde Polonia, onde viaxou para reunirse cos membros da OTAN na zona, o presidente estadounidense Joe Biden afirmou a cuarta feira que Rusia cometeu un “erro” ao suspender a súa participación no Start III ou Novo Start, o tratado que regulaba a redución de armas nucleares. Asemade, insistiu en que o conflito en Ucraína responde a un enfrontamento entre democracias liberais e autocracias, en contestación ao discurso do seu homólogo ruso a terza feira. No plano militar, as Forzas Armadas rusas volveron comunicar avances en Bakhmut, en Donetsk, o epicentro dos combates nas últimas semanas. Rusia destacou que as súas tropas xa están a loitar no centro da cidade. Amais, Ucraína demandou á Unión Europea que inclúa no paquete de sancións contra Rusia que está a negociar a Rosatom, a axencia pública rusa no ámbito nuclear, que até o de agora quedou fóra das medidas coercitivas pola dependencia tanto no bloque comunitario como nos EUA do combustíbel atómico que vende para alimentar as centrais nucleares. Xa no Estado español, a ministra de Defensa, Margarita Robles, informou de que enviarán seis tanques Leopard 2 a Ucraína, abrindo a porta a enviar máis se así o solicita tanto a OTAN como o Goberno de Kíiv.