A China lanza un plan de paz para Ucraína no aniversario da invasión rusa

Beijing presentou onte unha proposta para impulsar unhas negociacións de paz que acaben coa guerra en Ucraína no primeiro aniversario da invasión rusa, unha vía, a das conversas, que considerou a “única solución viábel para acabar coa crise”. A posición chinesa, na liña das proposicións diplomáticas do país nas últimas xornadas, insta a respectar “a soberanía, independencia e integridade territorial de todos os países”, e incide en que “non se debe buscar a seguridade dun país a costa dos demais”, sinalando que é preciso “abandonar a mentalidade da Guerra Fría” e “contribuír a forxar unha arquitectura de seguridade europea equilibrada, eficaz e sostíbel”. Para pór en marcha as negociacións de paz, o documento fixa como primeiro paso un apoio xeral da comunidade internacional ao cesamento de hostilidades, “evitando avivar as chamas e agravar as tensións”, para o que é preciso traballar co obxectivo de “desescalar gradualmente a situación e chegar finalmente a un alto o fogo integral”. Unha vez freada a violencia, Beijing comprométese a “seguir xogando un papel construtivo” para desenvolver negociacións de paz que poñan fin de forma definitiva ao conflito bélico, e mentres isto non aconteza solicita que a Organización das Nacións Unidas (ONU) sexa apoiada para resolver a crise humanitaria no país. Tamén fai fincapé en que tanto Ucraína como Rusia deben “cumprir estritamente o dereito internacional humanitario”, que protexe amais dos civís os prisioneiros de guerra. Ao tempo, resalta a necesidade de “reducir riscos estratéxicos” e oporse ao uso de armas nucleares, algo que tamén estende ás armas químicas, que Kíiv e Moscova se acusaron mutuamente de utilizar durante o último ano. A nivel económico, Beijing recomenda pór fin ás sancións unilaterais “non autorizadas polo Consello de Seguridade da ONU” ao considerar que azúan o conflito e “non resolven o problema”, ademais de subliñar a importancia de facilitar as exportacións de gran e evitar “o uso da economía mundial como ferramenta ou arma para fins políticos”. En última instancia, solicitou medidas para “apoiar a reconstrución posterior ao conflito" en Ucraína. Após presentarse o plan, o voceiro de Asuntos Exteriores chinés, Wang Wenbin, censurou a Organización do Tratado do Atlántico Norte (OTAN), “un produto da Guerra Fría”, por no disolverse despois desa época e operar en Asia, "convertendo o mundo nun lugar menos estábel”, e a Washington por “tentar subverter máis de 50 Gobernos estranxeiros” nos últimos 80 anos. Respostas á proposta Este plan chega despois dun aumento das tensións entre a China e os Estados Unidos (EUA), que incluíu advertencias esta semana de Washington e Bruxelas pola suposta intención chinesa de vender armamento letal a Rusia, algo que Beijing nega, cuestionando que son precisamente os EUA os que máis armas están a enviar ao campo de batalla. Após facerse pública a proposta da China, medios occidentais publicaron en pouco tempo que foi “desestimada rapidamente”, indica Bloomberg, citando os membros da OTAN ou os seus socios. O secretario xeral da alianza militar, Jens Stoltenberg, descartouno sostendo que a China non está en posición de negociar a fin da guerra pola falta de “credibilidade” que lle atribúe, mentres, a presidenta do Executivo da Unión Europea (UE), Ursula von der Leyen, reiterou a mesma mensaxe pola “amizade ilimitada” de Beijing con Moscova. Pola contra, o asesor de Seguridade Nacional dos EUA, Jake Sullivan, indicou que a China “non apoia por completo a Rusia no referente a esta guerra” e criticou o plan de paz. A pesar da posición marcada polos seus aliados, Kíiv “dá a benvida” á proposta de paz chinesa e salientou que “a estudaremos a fondo”, afirmou Emine Dzhaparova, viceministra primeira de Asuntos Exteriores do país, que sinalou que “somos aos que máis lles interesa ter algún tipo de paz”. Fóra da liña marcada por von der Leyen pronunciouse o Goberno alemán, que tras sinalar que faltan elementos importantes ao seu xuízo no plan definiu como “importante que a China discuta agora estas ideas directamente con Ucraína, xa que é a única forma de atopar unha solución equilibrada que teña en conta os intereses lexítimos de Kíiv”. Conmemoracións Na madrugada de onte a Asemblea Xeral da ONU aprobou unha resolución non vinculante presentada polo primeiro aniversario da invasión que condena Rusia e pide a súa saída de Ucraína por 141 votos a favor, 32 abstencións (entre elas á da India, Suráfrica ou a China), e 7 sufraxios en contra. Ademais, múltiples cidades da UE iluminaron edificios emblemáticos coas cores da bandeira ucraína e rexistráronse varias manifestacións de apoio a Kíiv. Na capital ucraína, o presidente Volodimir Zelenski encabezou un acto para honrar os soldados do país, aos que cualificou como “salvadores”, e avanzou que Ucraína se imporá na guerra ao longo de 2023 despois dun ano marcado pola “dor, tristeza, fe e unidade”. Desde Kíiv, Al Jazeera informa de que “non hai grandes reunións” por mor dos riscos inherentes á guerra, e destaca testemuños da poboación que reiteran que “a xente quere volver á normalidade” despois dun “conflito moi sanguento para os soldados e tamén para os civís”. Malia que non hai cifras fiábeis do número de falecementos entre os militares si o hai no que atinxe aos civís, o Alto comisionado da ONU para os Dereitos Humanos, Volker Türk, indicou que confirmaron 8.006 óbitos desde o 24 de febreiro de 2022, case a metade no oblast de Donetsk, cuxo control está disputado entre Rusia e Ucraína. A estas cifras hai que engadir a morte de 3.106 civís desde o comezo da guerra no país en 2014 até a invasión rusa. Arredor desta cuestión, Türk reclamou acabar cun conflito bélico “sen sentido” e “intensificar os esforzos para crear mecanismos de rendición de contas”. Máis de oito millóns de ucraínas e ucraínos están refuxiados en Europa, deles case tres millóns en Rusia, un millóns e medio en Polonia e un millón en Alemaña. Xa en Washington, o Executivo de Joe Biden lanzou un novo paquete de sancións contra Rusia, incluído un novo gravame ao seu aluminio, e fixo público outro envío de armamento a Kíiv por valor de 1.900 millóns de euros, co que eleva a máis de 46.000 millóns de euros o total de armas prometidas ao país. 84.000 soldados dos EUA en Europa O secretario de Defensa estadounidense, Lloyd J. Austin III, recalcou que para o seu país a invasión rusa é “o perigo máis urxente para a seguridade europea desde o final da Segunda Guerra Mundial”, nunha declaración na que tamén transmitiu que en resposta os EUA despregaron 20.000 soldados adicionais en Europa no último ano. Isto engádese aos 64.000 militares asignados de forma permanente no continente, segundo os datos do Comando Europeo dos EUA.