O acoso dos colonos israelís

Os palestinos e palestinas son vítimas da violencia diaria dos colonos israelís. Actualmente, en Cisxordania e Xerusalén Leste viven máis de 750.000 colonos nos 150 asentamentos ilegais, construídos parcial ou completamente en terras privadas palestinas que levan sendo expropiadas desde 1967. Os ataques nas estradas, as agresións a gandeiros ou a provocación en lugares de culto son diferentes formas de intimidación empregadas polos colonos. A rexión de Nablús é a máis afectada, seguida de Hebrón, Ramallah e Belén. A violencia colona forma parte dunha campaña de migración forzada para acelerar a expansión dos asentamentos e finalizar así o proxecto do "Grande Israel". Orit Strook, Ministra de Asentamentos, asegurou que "toda a terra de Israel é nosa e nós somos dela, por iso non haberá un Estado Palestino". Os colonos actúan con total impunidade, protexidos polo exército da ocupación e lexitimados polo Goberno de Tel Aviv, que destina arredor de 5 millóns de euros anuais en axudas especiais ás colonias e fomenta a concesión de armas. Segundo Bezalel Smotrich, Ministro de Finanzas, "os asentamentos son o cinto de seguridade para o Estado de Israel". No ano 2023 producíronse 2.410 ataques contra a poboación palestina e as súas propiedades, dos cales 206 contaron tamén coa participación dos soldados israelís. Nos últimos seis meses, marcados polo 7 de outubro, a violencia colona aumentou de forma exponencial, con xa máis de 300 agresións. En metade deles, o exército estaba presente, acompañando aos colonos ou participando activamente. Ameazas e agresións físicas Con frecuencia, grupos de colonos armados con pedras, coitelos, paus ou munición real, asaltan vehículos palestinos nas estradas ou controlan os accesos ás vilas e aldeas, atemorizando a poboación e limitando a liberdade de movemento. O 11 de outubro unha milicia de colonos asasinou a catro palestinos en Qusra (Nablús). No día a seguir, durante o funeral, seis colonos armados asasinaron a tiros a Ibrahim Wadi (63 anos) e o seu fillo Ahmad (24), ademais de ferir a 10 persoas por bala. Tamén o 12 de outubro, en Jeet (Qalqilia), outro grupo de colonos secuestrou un doutor. Ao mesmo tempo, o 13 de outubro, difundíronse vídeos de Ben Gvir, Ministro de Seguridade Nacional, distribuíndo armas no asentamento de Elad. Gvir, colono radical que incita publicamente ao odio contra os palestinos, aprobou unha medida para dar 10.000 armas gratuítas a colonos de Cisxordania. Desde 2019, polo menos 19 palestinos foron asasinados a mans de colonos, dos cales nove asasinatos foron rexistrados só en 2023. Os colonos israelís usan cans, armas e diferentes técnicas para facer desaparecer a poboación autóctona e roubarlle a terra O 12 de novembro, en plena xornada lectiva, dous colonos encapuchados, con chalecos militares e armados, entraron no patio dunha escola en Tuwani (Hebrón), tentaron roubar a bandeira palestina e insultaron ao director. O 17 de febreiro, nunha estrada do Val do Xordán, un colono atacou unha muller palestina, sacouna pola forza do seu vehículo e roubouno, deixándoa tirada na cuneta. Son exemplos do acoso constante e da total liberdade adoptada por colonos que actúan en solitario ou en grupo. Propiedades privadas atacadas Negocios, vivendas e automóbiles son tamén atacados, saqueados, queimados e destruídos. Este tipo de campañas de terror adoitan acontecer de noite ou de madrugada. Huwara, en Nablús, é unha das vilas máis castigadas desde 2023, onde se produciron dous ataques de gran escala antes do 7 de outubro. O 23 de xaneiro, na vila de Beitin (Ramallah), un grupo de colonos prendeulle lume a un negocio de automoción. O 16 de febreiro, varios colonos queimaron unha casa, un coche e dous palletes en Kisan (Belén). Tamén en febreiro, en Burqa (Nablús), unha milicia atacou con pedras varias casas e deixou coches completamente calcinados. Poboación beduína en perigo A terra agrícola é un dos obxectivos principais dos ataques, especialmente en Xericó e Masafer Yatta (Hebrón). Os colonos levan a cabo operacións de expropiación do gando nas comunidades beduínas e campañas de intimidación e tortura psicolóxica, para así ter control sobre o sustento de moitas familias e provocar o seu desprazamento forzado. Acompañados por cans e con armas, usan diferentes técnicas para facer desaparecer a poboación autóctona e desta forma poder roubar terras para a creación de futuros asentamentos. O 16 de decembro, colonos armados con fusís de asalto, intimidaron e atacaron a gandeiros en Masafer Yatta. O 30 de decembro, colonos vestidos con uniformes militares, impediron a un grupo de beduínos ir co seu rabaño aos mananciais da aldea de Khirbet Tana. O 23 de xaneiro, á fronte dunha escola beduína en Xericó, os colonos cavaron tumbas do tamaño dunha crianza como mensaxe de ameaza para toda a comunidade. Nas redes sociais son tendencia os vídeos nos que os colonos se burlan de secuestrar, dar malleiras e humillar o pobo palestino, celebrando os crimes que cometen de forma sistemática.