A Comisión Europea anunciou que "suspende todos os pagos" relativos á axuda ao desenvolvemento e axuda humanitaria a Palestina no marco da avaliación da axuda que presta a Unión Europea ás autoridades do país ocupado.
Porén, O comisario de Xestión de Crise, Janez Lenarcic, matizou que o Executivo europeo "non cortará a axuda humanitaria a Palestina" a pesar do anuncio de Oliver Varhelyi.
"A axuda humanitaria da UE aos palestinos continuará mentres sexa necesario", subliñou o comisario esloveno, matizando así o anuncio do comisario húngaro.
A mensaxe de Varhelyi
Nunha mensaxe en redes sociais, o comisario de Veciñanza, Oliver Varhelyi, confirmou que o bloque europeo conxela "de forma inmediata todos os pagos previstos" e que está a revisar todos os proxectos en marcha. Segue así os pasos de Austria, mentres que Alemaña informou de que está a revisar os seus compromisos de cooperación.
"Todas as novas propostas orzamentarias, incluída a de 2023, aprazadas até novo aviso e faremos unha avaliación exhaustiva de toda a carteira", afirmou o comisario húngaro, sobre unha axuda que cifrou en case 700 millóns de euros.
O responsábel de Veciñanza insistiu en que a "magnitude do terror e a brutalidade" do ataque lanzado contra Israel supón un "punto de inflexión" polo que en Bruxelas "non poden seguir coas cousas como até o de agora", ignorando así os sucesivos ataques dos últimos anos de Israel contra Palestina.
O comisario defendeu abordar "os fundamentos da paz, a tolerancia e a coexistencia" en Oriente Próximo, tras lamentar que "a incitación ao odio, a violencia e a glorificación do terror envelenaron as mentes de demasiadas persoas".
Varhelyi protagonizou unha polémica o pasado ano ao condicionar os fondos de asistencia á autoridade palestina correspondentes a 2021, en total máis de 200 millóns a que as autoridades realizasen unha reforma educativa, tras a controversia sobre se os libros de texto nas escolas promoven o odio e a violencia cara a Israel.
"Que non se suspenda a axuda humanitaria"
A deputada do BNG en Bruxelas, Ana Miranda apelou a Comisión Europea a que non suspenda a axuda humanitaria a Palestina.
"A Unión Europea tería que centrarse en impedir máis sufrimento e mediar para alcanzar solucións de paz”, destaca a eurodeputada nacionalista, quen sinala que Israel, como potencia ocupante, vulnera sistematicamente os dereitos do pobo palestino e comete graves crimes contra a humanidade, detencións arbitrarias, asentamentos ilegais e barbaridades, como declarou a ONU en diversas resolucións.
