O poder municipal en mans do BNG compareceu hoxe por vez primeira co novo portavoz nacional da organización frentista, Xavier Vence. Fíxoo para expresar a súa solidariedade coas persoas vítimas da estafa das preferentes e para mostrar a súa oposición ao anteproxecto da lei de administración local, por potenciar as deputacións e pór en risco, segundo a súa opinión, a prestación de servizos básicos.
Os rexedores nacionalistas -cos que tamén compareceu a nova responsábel de Política Municipal do BNG, Goretti Sanmartín- comprométense a poren en marcha desde os gobernos locais que presiden accións que permitan que "non se perpetúe este roubo a galegas e galegos".
A estafa representa, de acordo coas avaliacións do BNG, unha drenaxe de recursos de Galiza cara aos circuítos financeiros do Estado español. Cífrana en 600 millóns de euros. Cualifican a quita do 43 por cento de "expropriación inxusta e roubo a máis de 62.000 familias deste país que son veciños e veciñas nosos".
A respeito da súa crítica ao anteproxeto da lei de administración local, para alén de denunciar o fortalecimento das deputacións, expresan a súa oposición a que "desaparezan as funcións dos concellos de menos de 20.000 habitantes", competencias que pasarían a ser absorbidas polas corporacións provinciais.
