A Xunta aplaude a venda de Xeal e o persoal teme que sexa un "movemento especulativo"

Xeal cambia de mans. O grupo de dúas factorías e dez centrais hidroeléctricas que Villar Mir vendeu por 170 millóns de euros en 2019 vén de ser vendido pola até de agora propietaria, o fondo Sixth Street Partners, por ao redor de 300 millóns a Energo-Pro, grupo checo especializado en enerxía hidroeléctrica. Fundada en 1994 en Bohemia Oriental, Energo-Pro administra 38 centrais hidroeléctricas en Chequia, Bulgaria, Xeorxia ou Turquía e conta con 9.000 persoas empregadas. Ademais, ocúpase da distribución e venda de enerxía e administra as redes de distribución eléctrica de Bulgaria e Xeorxia. Ás veces, con polémica incluída: foi multada en febreiro polo Goberno de Bulgaria pouco antes de que o primeiro ministro, Boiko Borisov, anunciase a dimisión en bloque de todo o seu equipo após as masivas protestas contra a suba da luz por parte das compañías. A empresa checa adquire 100% de Xeal logo de que esta compañía fechase 2022 con máis de 24 millóns de beneficios, tres veces máis que en 2021. Persoal de Xeal reclama á Xunta que exixa á empresa que manteña a actividade industrial Preocupación Entre o cadro de persoal hai preocupación. Unha delegación da nova propietaria estivo onte en Cee, comarca de Fisterra, onde se asenta unha das dúas factorías do grupo, para un primeiro contacto cos traballadores. Entre eles hai inquietude, recoñecen desde o comité. Durante anos o persoal denunciou que o negocio hidroeléctrico (as centrais) é o que interesa aos diferentes propietarios, que non mostran o mesmo coidado polas factorías malia que a concesión dos encoros liga os megawatts hidroeléctricos ao mantemento do emprego nas fábricas de ferroaliaxes, situadas en Cee e Dumbría. Desde a CIG, que obstenta a presidencia do comité, alertan: "É unha operación puramente especulativa (...) O custe da compra sitúase nos 300 millóns de euros cando se nos dixo que o prezo das centrais era 174 millóns; é dicir, desde 2019 hai un beneficio claro de 130 millóns de euros que non tivo repercusión na comarca nin nas fábricas". O persoal de Xeal leva a empresa ante a autoridade laboral polo convenio Mais o cerne da preocupación, indica o sindicato nacionalista, é a "inclusión na operación a sociedade Feroe Ventures &amp; Investments, xa que a través deste fondo con sede nun paraíso fiscal preténdese construír a estación de bombeo da Ruña para esquivar así as condicións concesionais que levan vinculados os dereitos de explotación das centrais hidroeléctricas, como garante da viabilidade das factorías". Reaccións Pola súa parte, o alcalde de Dumbría, comarca de Fisterra, Raúl González (PSOE), manifestou onte que agarda que a nova propietaria "manteña o compromiso co emprego e os investimentos previstos". O presidente da Xunta da Galiza, Alfonso Rueda, en resposta a preguntas da prensa, cualificou a venda de "boa nova" e afirmou que a compradora é unha empresa "potente e solvente". Para Rueda, esta operación é un exemplo de que "vir investir na Galiza é unha boa decisión". O movemento en Xeal —que desde 2019 perdeu medio cento de postos de traballo directos e 80 eventuais— prodúcese nun escenario de anos de complicacións para a industria galega. A crise do conglomerado industrial déixase notar de diferentes formas. A un lado, o fechamento de compañías cun importante número de traballadores como Vestas en Viveiro (A Mariña), Gamesa nas Somozas (Ferrolterra), Alu Ibérica na Coruña ou empresas do naval na comarca de Vigo. Ao outro, relevantes centros industriais como Alcoa en Cervo (A Mariña) paralizaron de forma temporal a súa actividade. As grandes metalúrxicas fracasan nos seus intentos de recortar persoal Caída na produción Onte mesmo coñecíase o dato sobre o índice de produción industrial rexistrado en agosto, que na Galiza caeu 5,8% en comparación co mesmo mes de 2022, un descenso máis acusado que o da meda estatal, que foi de 3,6%. A Galiza encadea así tres meses consecutivos de retrocesos interanuais —xuño, xullo e agosto— xa que o último dato positivo foi en maio. Este 5,8 de diminución interanual é o peor dato negativo desde xullo de 2022. De feito, a industria galega sufriu un declive de 2% en 2022 mentres a actividade fabril creceu 3% no conxunto do Estado español. As empresas metalúrxicas rexistraron o ano pasado unha caída da produción industrial de 22 puntos. Porén, tomando como referencia 2008, a baixa do IPI (Índice de Produción Industrial) nese período é de 49,9, condicionada por algún factor conxuntural, como é a paralización da actividade no complexo de Alcoa, mais tamén determinada por razóns estruturais. Froito desta evolución, a industria atópase entre os sectores nos que existe un menor dinamismo laboral na Galiza. Un dato ao respecto: a Enquisa da Poboación Activa (EPA) rexistraba en 2008 201.300 persoas ocupadas na industria. En xullo de 2023, último mes con datos, son 167.400. 33.000 empregos destruídos nese período e 7.000 deles entre o primeiro trimestre de 2022 e o de 2023. Xeal anuncia 4 millóns para unha nova central no Xallas entre rumores de venda Litio na Galiza Por outra parte, a mineira canadense IberAmerican Lithium fíxose con 100% dos dereitos de dúas minas de litio no sur da Galiza: Alberta II e Carlota. Ambas as súas están na comarca do Ribeiro e suman unha extensión de 3.700 hectáreas. IberAmerican Lithium busca "descubrir o potencial sen explotar do litio" na Galiza.