A cifra de negocios da industria na Galiza caeu 7% en agosto respecto ao mesmo mes de 2022, un descenso máis acusado que a media do Estado (-6,2%), segundo informa o Instituto Nacional de Estatística (INE) esta cuarta feira.
Deste modo, as vendas da industria galega acumulan cinco meses consecutivos de contracción interanual, xa que o último dato positivo que se anotou o pasado mes de marzo.
Canarias (+9,5%), A Rioxa (+3,7%) e Euskadi (+0,5%) foron os tres únicos territorios que rexistraron subas nas vendas en agosto. No lado contrario sitúanse as maiores baixadas de: Cantabria (-16,8%), Balears (-16,6%) e Asturias (-13,5%).
No que vai de ano, entre xaneiro e agosto, a cifra de negocios da industria galega acumula un retroceso de 0,2%, moi similar a 0,3% de diminución na media do Estado.
No Estado, a cifra de negocios da industria baixou 6,2% o pasado mes de agosto en comparación co mesmo mes de 2022, debido, principalmente, ao retroceso das vendas da enerxía e dos bens intermedios, que diminuíron 17,7% e 13,1%, respectivamente.
Descenso interanual
Co descenso interanual de agosto, a facturación da industria encadea xa cinco meses de caídas interanuais, aínda que a de agosto foi máis pronunciada que a rexistrada o mes anterior (-5,1%).
En termos mensuais (agosto sobre xullo) e en datos corrixidos de estacionalidade e calendario, a industria elevou as súas vendas 0,7% no Estado, unha décima menos que en xullo. Con todo, con esta repunta mensual, xa son dous os meses consecutivos nos que a industria aumenta a súa facturación.
