A industria galega sufriu un declive de 2% en 2022 mentres a actividade fabril creceu 3% no Estado

Esta sexta feira tivo lugar no reitorado da Universidade da Coruña (UDC) a presentación do Anuario 2023 do Foro Económico da Galiza, nun acto no que participaron Julio Abalde Alonso, reitor da Universidade da Coruña; Inés Rei, alcaldesa da Coruña; Emilio Pérez Nieto, presidente do foro; Santiago Lago Peñas, director do foro, e José Luis Gómez, editor do Anuario 2023 do Foro. Ademais, a ministra española de Traballo, Yolanda Díaz, participou do acto a través dun vídeo. O anuario dedica un apartado ás implicacións e perspectivas da economía galega no novo contexto mundial, realizado polos economistas Fernando González Laxe, José Francisco Armesto Pina e Patricio Sánchez Fernández. Segundo estes autores, "pola súa importancia, cabe destacar negativamente a contracción experimentada [en 2022] pola industria manufactureira [a que se dedica á transformación da materia prima ou de produtos semielaborados en novos bens de consumo final] na Galiza, o que contrasta co dinamismo na economía española".Máis en concreto, a industria manufactureira galega perdeu 0,5% do seu peso económico no ano 2022, mentres que este sector tivo unha variación positiva de 3,8% durante o mesmo período no Estado español. Ao atender ao sector industrial en xeral, a caída na Galiza é aínda maior, de 2%, mentres que a actividade fabril creceu 3% a nivel estatal. Froito desta evolución, a industria atópase entre os sectores nos que existe un menor dinamismo laboral na Galiza. "Redúcese a ocupación entre as persoas traballadoras por conta propia (2,4% menos respecto ao ano anterior; 5.100 persoas menos) e os asalariados no ámbito público, así como no sector industrial e entre as persoas de 35 a 44 anos", resaltan os expertos. A produción industrial galega está 35,4 puntos por baixo da alcanzada en 2008 A crise industrial galega xa se deixaba notar antes da influencia da Covid, cun descenso da actividade no sector en 2019 de 7%. Unha caída que se acrecenta no ano da pandemia, en 2020, ao alcanzar 12,1%. Pese ao rebote de 3,9% en 2021, o retroceso industrial do país volveu o ano pasado coa taxa negativa de 2%. Perda de competitividade A Galiza ocupa o posto 143 entre as 234 rexións incluídas no índice de competitividade da Unión europea A economía galega perdeu postos a nivel comunitario e estatal no Índice de Competitividade Rexional (ICR) durante os últimos anos, segundo sinala o anuario en base aos datos da Comisión Europea. Desta forma, a Galiza caeu seis posicións entre as rexións da Unión Europea (UE) cunha maior puntuación no ICR, pasando ao posto 149 desde o 143 no inicio da serie, en 2016. Ademais, atópase por baixo da media comunitaria. No contexto estatal, a Galiza perdeu unha posición, pasando do noveno ao décimo posto. Bruxelas constata un retroceso na Galiza en sanidade, ensino e innovación Así as cousas, mentres a foto fixa correspondente ao ano 2022 sitúa a Galiza a nivel xeral no posto 143 entre as 234 rexións da UE analizadas, ocupa o posto 169 no indicador de eficiencia e o 130 no de innovación. Na parte positiva, cabe destacar o avance rexistrado no relativo á capacitación tecnolóxica na Galiza, que se sitúa como a rexión 55 das 234 analizadas na UE (ocupaba o 141 en 2016), o que contrasta, no ámbito da innovación, co retroceso experimentado na posición relativa da Galiza tanto en sofisticación empresarial como no da innovación, onde se sitúa nos postos 171 e 155 respectivamente. Desvertebración da Galiza Sobre os corredores europeos e a vertebración e inserción da Galiza, González Laxe explica que "a construción de infraestruturas, e máis en concreto as que fan mención ao ferrocarril, viñeron sendo xustificadas baixo unha tripla referencia: como un instrumento do desenvolvemento rexional; como unha contribución á mellora da competitividade, e como aquelas que xeran unha mellor vertebración do territorio". Neste sentido, o economista salienta que "a Galiza precisa conexión ferroviaria entra as cidades, non quedar excluída do corredor atlántico e coordinar portos e aeroportos". Falta de planificación nos fondos da Unión Europea As economistas María Cadaval e María Loureiro sosteñen que "a UE ten aprobado un ambicioso plan para impulsar a recuperación e transformación da economía tras a pandemia, outorgando unha importancia significativa ao Estado polo impacto diferenciado da crise". Por iso, destacan, "a súa execución será determinante no futuro da economía estatal e galega". Porén, critican as economistas, a Xunta da Galiza "carece dun plan estratéxico para as subvencións e dun plan anual de contratación que permita a execución do Plan de recuperación, transformación e resiliencia". A Aesia como unha oportunidade A catedrática e coordinadora do Laboratorio de Investigación e Desenvolvemento en Intelixencia Artificial (LIDA) da Universidade da Coruña (UDC), Amparo Alonso, ve a Intelixencia Artificial (IA) "esencial para a economía mundial". Neste sentido, Alonso considera que "a presenza da Axencia Estatal de Supervisión da Intelixencia Artificial (Aesia) na cidade da Coruña constitúe unha interesante oportunidade para a Galiza, que en parte está na nosa man aproveitar". Inés Rei, alcaldesa da Coruña: "Apoian Rueda e Feixoo a posición do presidente andaluz do PP contra a sede da Aesia na Coruña?"