A Comisión dos Mercados e a Competencia (CNMC) distribuíu en outubro de 2021 os concellos de todo o Estado en dúas zonas diferenciadas, atendendo ao servizo que prestan as operadoras telefónicas.
Creáronse así a chamada "zona libre", aquela na que se poden atopar tres ou máis redes de banda ultra-ancha, deixando ás compañías total flexibilidade para a configuración das súas ofertas e prezos, e a "zona regulada" no resto de municipios, nos que só existen unha ou dúas operadoras, polo que a CNMC entende que as tarifas teñen que estar supervisadas, o que implica determinadas restricións para as compañías telefónicas á hora de configurar a súa oferta comercial.
Ante esta situación, o deputado do BNG no Congreso, Néstor Rego, vén de rexistrar iniciativas reclamando ao Goberno do Estado que tome medidas para garantir a igualdade de dereitos das persoas consumidoras.
Nas zonas reguladas as operadoras teñen certas restriccións para ofertar precios competitivos
Neste senso, critica que a regulación da CNMC "impide o acceso ás ofertas máis competitivas nas zonas reguladas, o que obriga en moitas ocasións a acollerse aos paquetes máis caros das compañías que operan nese territorio".
De facto, apunta Rego, estase a impedir que as persoas consumidoras da maioría dos concellos galegos poidan acceder ás mellores condicións das compañías telefónicas.
"Dos 313 concellos existentes na Galiza, só 9% dos municipios están incluídos nesa chamada zona libre, mentres que ao resto de galegos e galegas impídeselle contratar as mellores ofertas das distintas operadoras" denuncia o deputado do BNG.
En opinión de Rego, a regulación debería garantir que se ofreza en todos os casos unha tarifa a prezo de mercado nas mesmas condicións que nos concellos da "zona libre".
