Virgilo Márquez sinalou en Vigo, durante unha palestra desenvolvida nos locais do Círculo de Empresarios da Galiza, que “a fiscalidade, ben desenvolvida, ben deseñada e cun diálogo previo, pode ser unha ferramenta para compensar as comunidades locais costeiras, as confrarías, as contornas de pesca e para poder proporcionarlles uns ingresos". Nesta liña, premeu o Executivo do Estado a adxudicar os proxectos de eólica mariña, porque “se non se convoca a poxa este ano, vai ser moi difícil chegar a 2030 para cumprir a folla de ruta”.
A fiscalidade
O director xeral da patronal eólica española reclamou unha fiscalidade para a eólica mariña “ecuánime” na que "todos poidan ver reflectidas as súas realidades nese novo deseño fiscal". A este respecto, indicou que "dese estudo de impacto ambiental poden saír medidas compensatorias que os propios proxectos teñan que achegar ao territorio. Que poden ir desde o desenvolvemento de infraestruturas ou o apoio ao desenvolvemento de necesidades que poidan ter os colectivos, como está a pasar en terra. Cada proxecto é un traxe a medida".
O voceiro da Plataforma en Defensa da Pesca e dos Ecosistemas Mariños, a entidade que agrupa confrarías de pescadores de todo o Estado que rexeitan o modelo eólico do Goberno español, Torcuato Teixeira, sinalou a Nós Diario que “saben que se un polígono eólico se desenvolve nunha zona de pesca, as embarcacións que traballan alí deben cesar na súa actividade ou trasladarse a outra zona, aumentando a presión e o esforzo pesqueiro sobre ese novo caladoiro”. Nesta dirección, cualifica de “brinde ao sol” as palabras de Márquez.
Mobilizacións
Teixeira explicou que “antes de falar de compensar o sector do mar, hai que saber cal é o dano desas instalacións eólicas desde o punto visto ambiental e socioeconómico e, unha vez coñecido, determinar se a actividade de xeración eléctrica é compatíbel coa pesqueira”. Neste punto, destacou a importancia do complexo pesqueiro para a Galiza, “un sector que xera un importante número de empregos e que non é un castelo no ar, como as cifras de ocupación que atribúen á eólica mariña”.
A Plataforma en Defensa da Pesca e dos Ecosistemas Mariños manterá o sábado unha xuntanza na localidade asturiana de Puerto de Vega para concretar un calendario de mobilizacións contra o proxecto de Real Decreto polo que se regula a produción de enerxía eléctrica en instalacións emprazadas no mar, presentado a pasada segunda feira polo Executivo do Estado español. Neste sentido, Torcuato Teixeira considera que “a aprobación do proxecto dá o disparo de saída á poxa dos nosos caladoiros da pesca para seren ocupados pola industria da eólica mariña”.
