A Plataforma en Defensa da Pesca e dos Ecosistemas Mariños criticou esta sexta feira o "total desprezo" da vicepresidenta terceira e ministra para a Transición Ecolóxica e o Reto Demográfico, Teresa Ribera, cara ao sector, ao rexeitar reunirse cos seus representantes dous anos despois de rexistrarse a primeira petición. A través dun comunicado, a asociación que representa profesionais do mar de Canarias, Asturias e Galiza lamentou que o pasado 1 de febreiro enviou unha solicitude de encontro con Ribera que, a día de hoxe, aínda non foi respondida.
O obxectivo do mesmo era abrir unha vía de diálogo tras a demanda que interpuxo a Plataforma ante o Tribunal Supremo en relación aos plans do Goberno estatal sobre a ordenación do mar e os espazos previstos para desenvolver proxectos de produción de enerxía eólica mariña, explicando á ministra os motivos e as preocupacións dos pescadores sobre como pode afectar o sector.
"Queremos denunciar que a pesar de que despois de dous anos desde a nosa primeira petición de reunión á ministra, e a pesar das manifestacións públicas de Teresa Ribera tras a aprobación dos Plans de Ordenación do Espazo Marítimo (POEM), da súa vontade de reunirse co sector pesqueiro representado pola Plataforma, a día de hoxe a nosa última petición, do 1 de febreiro, non recibiu ningún tipo de resposta, mentres se anuncia a inminente aprobación do marco regulatorio para a adxudicación de polígonos de eólica mariña en augas españolas, todo iso de costas totalmente aos pescadores afectados", criticou a entidade.
Así, lamentaron o "total desprezo" da ministra cara ao sector pesqueiro, "mentres se pasea por diferentes congresos e encontros patrocinados polo lobby das industrias enerxéticas". "Négase a escoitar e informar os pescadores afectados polos POEM sobre a planificación en relación á implantación da eólica mariña nas nosas augas, a pesar da evidente afectación á actividade pesqueira e os ecosistemas mariños nas zonas proxectadas", engadiron.
Por todo iso, a Plataforma pretende levar a cabo unha serie de protestas para que o Executivo "defenda e escoite" as e os pescadores antes de empezar a poxar o territorio mariño "ao mellor ofertante".
