O paro rexistrou este mes de outubro 2.705 persoas máis que o mes anterior, contabilizándose un total de 133.348 desempregados na Galiza. Ao mesmo tempo baixou a afiliación media á Seguridade Social con 3.259 persoas afiliadas menos que o mes anterior, descendeu en 0,3%, quedando a media de afiliación en 1.067.851 persoas. A nivel estatal experimentouse tamén un incremento do paro, mais neste caso aumentou a afiliación en 0,4%.
Segundo o secretario de Emprego da Confederación Intersindical Galega(CIG), Francisco González Sío, a evolución do paro e da afiliación a Seguridade Social está relacionada co agravamento de problemas xeográficos como a emigración. Ademais afirma que os datos de persoas desempregadas na Galiza confirman que o 60% das persoas desempregadas son maiores de 45 anos. Isto débese a que as actividades que producen máis emprego no país “son aquelas que demandan moito traballo físico, como hostalería e restauración, do sector Servizos” e quen adoita ocupar eses postos de traballo é xente nova.
-
A CIG sinala que o 81% da caída da afiliación corresponde a Pontevedra mentres que na Coruña se mantén, consecuencia de que neste último mes aínda permanece o efecto Xacobeo. Ao acabar a época estival o sector Servizos perde forza e a causa disto baixa preocupantemente a afiliación á Seguridade Social.
-
O secretario confederal de Emprego da CIG conclúe que o descenso céntrase principalmente nas persoas con contrato temporal, que son 7.000. Relaciona isto coa reforma laboral “cando baixa o traballo hai un descenso enorme das persoas eventuais e despídense sen ningún tipo de problemas e cando sobe o emprego aumenta a temporalidade”. Segundo os datos consultados por González Sío, 42.700 persoas tiveron contrato temporal neste mes “igual que antes da reforma laboral”, sinalou.
Destaca tamén a situación cos contratos indefinidos, dos preto de 5.000 deste mes, 2.600 son fixos discontinuos. Indica que os que tiñan contrato temporal de obra e servizo agora teñen contrato indefinido. “Cambiouse a nomenclatura mais temporalidade e a precariedade persisten”, afirma o representante da CIG.
A organización remarca que o 84% do paro creado en outubro corresponde ao sector servizos. Por esta razón relacionan o mercado laboral galego co modelo económico. “Baséase en sectores moi precarios. Cando hai unha baixada da demanda desfanse das persoas que traballan nese sector e cando hai aumento demandan traballadoras e traballadores e descende o paro”.
Ante esta escena, desde a CIG advirten da dependencia da situación económica e do perigo que supón en caso de que haxa unha nova crise, xa que “non hai emprego nin seguro, nin con condicións dignas”, afirman.
