A economía galega contráese 0,3% coa debilidade nas exportacións

A economía galega continúa ralentizando o seu ritmo de crecemento. O informe presentado esta quinta feira en Compostela polo Foro Económico da Galiza, relativo ao terceiro trimestre de 2023, salienta que, en termos interanuais, o Produto Interior Bruto (PIB) galego medra 1%, oito décimas inferior á media española. En termos intertrimestrais contráese 0,3%, feito que non acontecía desde o segundo trimestre de 2020, o que contrasta coa medra de 0,3% no caso da economía estatal. O sector cárnico da Galiza só xera 5% da produción total do Estado español Na elaboración do estudo, coordinado polo economista Fernando González Laxe, participaron Santiago Lago, Francisco Armesto e Patricio Sánchez. Este último explica a Nós Diario que a razón desta situación procede “da debilidade que temos na Galiza no comercio exterior”. Neste sentido, constata que “se até hai pouco era un claro soporte do crecemento da nosa economía, agora mudou totalmente e é un lastre”. Atendendo á súa evolución desde o comezo da crise orixinada pola pandemia da Covid-19 contrasta o valor das exportacións en relación co cuarto trimestre de 2019 a nivel estatal, un 3,4%, coas galegas, un 0,5%. “Quen soporta agora ese PIB son as economías domésticas, co incremento do consumo”, asegura Sánchez, “e menos mal, senón estariamos falando de problemas maiores, engade. Porén, o gasto en consumo privado medra máis no Estado español, 1,1%, fronte a tan só 0,2% na Galiza. “É outra debilidade que non é nova, levamos catro trimestres en que acontece”, sinala o economista, "podemos falar dun trimestre de incerteza", engade. O Foro Económico da Galiza alerta da "desadesaceleración" Maior dinamismo no sector servizos No terceiro trimestre de 2023 o crecemento de 1% do PIB galego vén explicado polo dinamismo do sector servizos e en menor media do sector da agricultura e a pesca, o que contrasta coa contracción experimentada no caso da construción e da industria. Por contra, na economía estatal os catro grandes sectores presentan taxas de variación interanuais positivas. Na Galiza é o sector servizos o que presenta a taxa de crecemento interanual máis elevada (2,1%). O estudo fai fincapé, ademais, no crecemento de 0,9% do sector primario. O informe apunta a que o crecemento do valor engadido bruto xerado polo sector servizos, con todo, foi tres décimas menor que no conxunto do Estado español, aínda que é a actividade de maior dinamismo. O conxunto de actividades de comercio, transporte e hostalaría medra na Galiza nese período 2,9% fronte ao 3,3% no Estado español, mentres que as actividades artísticas, recreativas e outros servizos aumentan 1,8% (8,9% no conxunto do Estado). Por contra, o crecemento das actividades profesionais na Galiza é superior ao rexistrado no Estado español, situándose as taxas de variación interanual en 3,7% e 0,4%, respectivamente. Por último, o informe indica que o sector das actividades de información e comunicacións contráese 1,4% na Galiza, o que contrasta coa medra de 5,8% estimada para a economía do Estado español. A industria galega sufriu un declive de 2% en 2022 mentres a actividade fabril creceu 3% no Estado Industria manufactureira O sector industrial galego no seu conxunto presenta unha significativa contracción da actividade, cunha caída interanual de 2,5%, o que contrasta coa medra interanual de 0,5% no Estado. En particular, o estudo resalta o desigual comportamento da industria manufactureira que, en relación á media estatal, considera que segue a ser “especialmente grave”. En concreto, esta sitúase 5,1% por baixo da media do Estado español en termos de horas traballadas e tan só dúas décimas medindo en relación aos postos de traballo equivalente a tempo completo. “A problemática non é nova mais medra co paso do tempo”, asegura a Nós Diario Patricio Sánchez, “cando é preciso ter unha industria manufactureira forte por ser a que máis emprego crea”, engade. Apunta a que as empresas galegas neste ámbito en concreto “seguen a ter debilidades” e están moi lonxe “da porcentaxe de referencia para as economías desenvolvidas, que é de 20%”. Desfase entre o mercado de traballo e a economía Malia a ralentización da actividade económica, segundo o informe, o mercado de traballo presenta datos agregados positivos atendendo aos niveis de ocupación e á redución do desemprego. Ao igual que en trimestres anteriores, indica unha mellora tanto da participación das persoas no mercado laboral como na ocupación (taxas de actividade e de emprego), reducíndose ademais a taxa de paro. En relación á taxa de actividade, explica que a participación laboral na Galiza mantense no último trimestre en case seis puntos por baixo do estimado no conxunto do Estado español. Este indicador ascende até 53,6% no terceiro trimestre (59,4% no Estado). A taxa de actividade feminina é notabelmente inferior á masculina, con valores de 49,6% e 58%, respectivamente, o que supón un diferencial de 8,4 puntos porcentuais (7,7 puntos no anterior). No conxunto do Estado, o diferencial mantense por riba do existente na Galiza (9,7 puntos), aumentando a taxa de actividade feminina até 54,7% e a masculina até 64,4%. Só 7% das empresas galegas usan a intelixencia artificial na súa actividade diaria No que á taxa de ocupación se refire, a relación entre a poboación ocupada e a poboación maior de 16 anos ascende na Galiza até 48,6%, aumentando o diferencial con respecto á media estatal que se sitúa en catro puntos fronte aos 3,8 do ano anterior (no Estado ascende até 52,4%). Esta porcentaxe mantén a Galiza como a cuarta comunidade autónoma con menor taxa de emprego, por diante de Asturias (44,9%), Andalucía (46,9%) e Estremadura (47,3%). Aínda que positivos para os autores do informe, os datos de emprego deixan unha incógnita que aínda non resolveron dentro do conxunto da economía galega. Para Patricio Sánchez hai “un desfase na Galiza entre o comportamento do mercado de traballo e o comportamento xeral da economía”. Recoñece o economista que é unha circunstancia que "aínda non somos capaces de explicar" o feito de que se porte "relativamente mal a nosa economía, o PIB en xeral, en relación ao comportamento do emprego". En todo caso, Sánchez advirte de que aínda falta por ver como serán as cifras globais que fechen 2023.