A Constitución, ferramenta contra a especulación coa enerxía

"O Banco de España sinala as enerxéticas coma as empresas que mais espremeron as crises de inflación. A institución demostra que nalgúns sectores subiron os prezos máis do que lles aumentaron os custos de produción dende o 2021". Podía dicir: "Non hai máis preguntas señoría", e rematar xa este artigo, pero non, vou entrar polo miúdo nesta nova. Sempre lembro unha frase dun patrón de pesca bretón co que coincidín nunhas xornadas hai xa anos, antes da pandemia, que nunhas xornadas no Cetmar en Vigo falando da nefasta xestión da pesca por parte da UE, dicía que, moitas veces, malia se poder pescar certas especies pola súa abundancia constatada polos pescadores, as cotas impostas sen contar coa información real que percibían os pescadores facía que moitas veces tivese que dicirlle aos mariñeiros que tirasen parte das capturas ao mar despois do traballo que lles dera traelas a bordo, e el definía esta situación cunha metáfora moi gráfica: "É como cuspirlle na cara a un mariñeiro". Pois ben, esta nova é coma cuspirlle na cara a miles de persoas que sofren a pobreza enerxética no noso Estado, só en Galiza xa temos case 100.000 persoas que sofren esta situación. Fronte a isto empresas como Naturgy, Iberdrola, Repsol, etc. anuncian ganancias desorbitadas. No caso das enerxéticas españolas dobran, ademais, os beneficios da media das enerxéticas da UE, e de novo nun proceder nada empático coa cidadanía seguen especulando coa enerxía. Así, mentres a variación dos seus custos de produción en 2022 foi de +57%, a variación dos prezos a que nos venden a enerxía que producen foi de +89%. Por comparar con outros sectores, para darnos unha idea do que estamos falando, o comercio polo miúdo tivo unha variación de custos de +11% e a variación de prezos dos seus produtos foi de +11%; e a agricultura e gandaría tiveron unha variación de custos de 26% que derivou nunha variación de prezo dos seus produtos de +24%. Si, nun contexto de elevada inflación e de moitos cidadáns sumidos na pobreza enerxética este é o cadro que temos a día de hoxe. Interese xeral E ante este panorama, que podemos facer? Sería a pregunta. Ben, pois eu gosto moito do artigo 128 da Constitución, tanto do punto 1 como do punto 2. Imos lembralo. O 128.1 indícanos que toda a riqueza do país nas súas distintas formas e calquera que sexa a súa titularidade está subordinada ao interese xeral. Pero tamén é moi importante ter en conta o 128.2, que recoñece a iniciativa pública na actividade económica. E mediante lei poderán reservarse para o sector público recursos ou servizos esenciais, especialmente en caso de monopolio e poderase acordar a intervención de empresas cando así o esixa o interese xeral. Si, a Constitución española pode ser unha ferramenta moi útil para salvagardar o interese xeral e actuar en prol da súa consecución. As enerxéticas españolas dobran os beneficios da media das enerxéticas da UE Pero claro, para empregar esta ferramenta debemos todos ter claro, e sobre todo aqueles que teñen capacidade de adoptar decisións políticas dende os Gobernos, que hai cousas como son a sanidade, a educación, a natureza ou a enerxía, por exemplo, que non deben ser tratadas coma meras mercancías, e que cando falamos destas cuestións non son meras cuestións económicas, senón cuestións políticas de suma importancia que inflúen na mellora da calidade de vida da cidadanía. Prioridades Un goberno de esquerdas que mereza tal nome debe apostar por políticas transformadoras e rupturistas deste estado de cousas que aquí estamos denunciando. Cando a xente vexa que os partidos de esquerda apostan claramente polo interese xeral e, polo tanto, que non van permitir que se nos cuspa na cara por parte dos especuladores cun ben de primeira necesidade como é a enerxía, cando a xente vexa que os partidos da esquerda apostan por que a iniciativa pública na actividade económica sexa real, e que toda a riqueza do país estará supeditada ao interese xeral, entón estaremos facendo política e xustiza, entón estaremos avogando por unha máis xusta distribución das rendas e da riqueza do país tal como nos di tamén por certo outro artigo da nosa Constitución, o 131.1. Si, temos unha Constitución totalmente bipolar, metéusenos unha monarquía herdeira da ditadura franquista, pero tamén temos un título VII que nos pode dar moito xogo. En definitiva, os intereses xerais e o ben común atopámolos se priorizamos as necesidades colectivas e dos mais necesitados, pero se priorizamos outros intereses privativos e particulares estariamos a outra cousa, pero para iso xa está a dereita, non si?