Centos de sacrificios de animais sans

Está a ser noticia unha granxa de Manzaneda na que se obriga o seu titular a sacrificar 46 animais sans, que ata o de agora sempre deron negativo ás probas da tuberculose bovina. A causa é que nesta granxa, na última campaña de saneamento gandeiro, foron positivos tres animais ás probas da tuberculose bovina, animais que xa foron sacrificados. Ata hai pouco tempo os protocolos do Ministerio e da Consellería do Medio Rural ordenarían o sacrificio dos animais positivos, facer novas análises aos 45 días e de maneira progresiva para descartar que houbese máis animais afectados. Actualmente o criterio, cando aparece un animal positivo en probas de laboratorio, é matar todos os animais da granxa ou unidade epidemiolóxica. Así, por exemplo, o ano pasado houbo un animal positivo nunha gandería da Terra Chá e decidiron o sacrificio de 400 animais de dúas granxas que tiña o titular, por certo dun mozo que se incorporara había pouco. Cando e por que houbo ese cambio de criterio? A finais do ano 2021 a Comisión Europea declarou Galicia zona libre de tuberculose bovina, un recoñecemento que levaban demandando dende había tempo. Naquel momento, dende o Ministerio de Agricultura, Pesca e Alimentación destacaron que o estatuto libre de tuberculose era un paso moi importante, que confirmaba o éxito do programa de erradicación estatal desta doenza que se implantou a principios dos anos 90, e que supoñía tanto un incentivo para as administracións públicas como para os sectores produtivos, pois significaba a posibilidade de flexibilizar algunhas medidas. A Xunta aforra facer as campañas de saneamento anuais que si demostraron ser eficaces no control da tuberculose A Xunta de Galicia aproveitou esta flexibilidade para pasar as campañas de saneamento anuais a campañas cada dous ou tres anos, pero cal foi o incentivo para as gandeiras e gandeiros? De matarche o animal con enfermidade a matarche toda a explotación. Se a explotación de Manzaneda estivese noutra comunidade autónoma na que non houbese prevalencia cero non matarían os animais que dan negativo nas probas da enfermidade. A norma recolle que onde hai máis enfermidade non se faga baleiro sanitario e en comunidades como a galega, co primeiro positivo, xa acordan matar todo. Moi coherente. Unha escolla errada E realmente está erradicada a doenza en Galicia? En primeiro lugar seguen entrando animais de comunidades como Cantabria, Castela León ou Estremadura, por exemplo, onde a prevalencia da enfermidade é moito máis alta. Ten maiores garantías de non ter tuberculose no futuro o gandeiro de Manzaneda cos animais que compre que seguindo analizando os animais da súa granxa e quedando cos que estean sans? Por outra parte, todos os estudos científicos indican que a tuberculose bovina se mantén en reservorios silvestres como as poboacións de corzos, cérvidos en xeral, porco teixos ou xabarís, que en Galicia temos poucos. É posible erradicar 100% a enfermidade nestas condicións? Entendemos que hai que seguir defendendo os programas de saneamento anuais, que se demostraron totalmente eficaces ata o momento, e deixar de tomar medidas efectivistas como é matar centos de animais maioritariamente sans, cunha eficacia residual dende o punto de vista do control da enfermidade e terroríficas nos seus efectos sobre as familias gandeiras afectadas e sobre esas granxas. Galicia non debería escoller aforrar en campañas de saneamento necesarias a cambio de aceptar o sacrificio de centos de animais sans. E logo un pouquiño de humanidade, please. Dicirlle nunha reunión veciñal a unha persoa que está a criar e coidar os seus animais 365 días ao ano que llos van matar todos, e que, como se opoña van ir coa Garda Civil e quitar as axudas, pois que queredes que vos diga? Ou que ten a obriga de colaborar en agarrar as crías para eutanasialas todas. En que punto de toda esta macabrada entra a Lei de Benestar Animal? Á parte de aforrar a Xunta en campañas de saneamento, de que os matadoiros a onde chegan os animais lle paguen a metade polo quilo de carne do que pagan habitualmente, en que beneficia matar centos de animais sans? Cal é o problema de que se lles poidan facer as probas dispoñibles para evitar que se sacrifiquen animais enfermos? Ah, e a xente labrega tamén somos persoas, non se nos pode tratar como delincuentes. Se non cambiamos isto, a historia de Manzaneda repetirase unha e outra vez en diferentes lugares, e o pretexto será controlar a enfermidade pero a razón é simple, así a Xunta aforra facer as campañas de saneamento anuais que si demostraron ser eficaces no control da tuberculose. A campaña de erradicación é estatal pero a Xunta tamén terá algo que dicir se as gandeiras e gandeiros galegos estamos a ser totalmente maltratados e discriminados.