Nado en Paradela (comarca de Sarria) un 3 de novembro de hai 42 anos, o laureado futbolista Diego López anunciou a súa retirada. Faino tras máis de 20 anos dedicándose a ser porteiro. Anunciouno no foro A Unión-O Progreso. O seu último equipo foi o Raio Vallecano, co que finalizou contrato o pasado 30 de xuño.
Desde esa data permaneceu sen fichar por ningún equipo, e agora decide pór a fin á súa extensa carreira futbolística. Iso si, López ten pensado seguir ligado ao fútbol como adestrador.
O porteiro debutou co Lugo en 1998, no que sería o seu primeiro equipo de moitos que virían despois. Foi no equipo da cidade amurallada onde empezou a destacar, chegando a ser un dos mellores da súa xeración. Con 18 anos foi fichado polo Real Madrid C, que xogaba na Terceira División. Logo foi cedido ao Alcorcón en 2001 e regresou de novo ao Madrid Cs. Asentouse como titular no Castela, logrando o ascenso a Segunda División, o que lle serviu para ser convocado co primeiro equipo.
Na tempada 2005/2006 conseguiu facerse un oco como suplente de Iker Casillas. Debutou en Primeira División en partido oficial o 30 de abril de 2006 fronte ao Osasuna. Logo, no Vilareal consolidouse como titular amosando as súas grandes cualidades como porteiro. Foi convocado pola Selección española. Despois marcharía ao Sevilla.
O Real Madrid, adestrado por José Mourinho decidiu fichar López para suplir un lesionado Casillas e acabou sendo porteiro titular até con Casillas xa recuperado. En agosto do ano 2014 fíxose oficial a súa fichaxe polo Milan. En agosto de 2016 saíu cedido ao Espanyol. A tempada pasada xogou no Raio Vallecano.
