Estamos en Derry! Hoxe comezaron os GAA World Games 2023 nesta fermosa cidade de Irlanda do Norte. Neste caso, Galiza estará representada por catro equipos: dous masculinos e dous femininos. Tamén por galegas e galegos que xogarán esta edición dentro dos combinados de Europa e Iberia. E aquí estamos. Nunha cidade que nos recibiu con chuvia, algo de frío (vaia! Que estamos coma na casa) e con moitas nacionalidades coas que agardamos compartir partidos de moito contacto e terceiros tempos tamén intensos.
Esta segunda feira tocou madrugar. Ás 7.15 horas da mañá a expedición saíu cara Owenbeg, a 25 minutos en autobús de distancia, para comezar o primeiro día de competición. Foi unha viaxe con nervios, pero tamén con moitas risas.
O ambiente desta selección é incríbel. Os máis maiores gozamos disto o dobre, xa que sabemos o complicado que pode ser acudir a unha competición e xestionar as emocións.
En canto aos resultados, día de vitorias (Galiza Senior 12 - 11 Ottawa) e derrotas (Galiza Masculina Intermediate 1 - 8 Francia Int.), isto acaba de comezar. Como anécdota, na categoría das rapazas vivimos o debut de Camboxa contra as nosas (triunfo fácil: Galiza Feminina Senior 26 - 0 Camboxa). Ilusionante celebrar puntos e ter o respecto de toda a bancada. Deporte en estado puro.
Pola tarde, e aínda que para nós sería a hora da merenda, tocou un pouco de relax e diversión. Desfilamos para as veciñas de Derry, que nos deron a benvida á súa cidade, repleta de murais e imaxes impactantes da historia do país irmán.
E somos máis de 2.500 deportistas de todo o mundo! Unha gran festa! Pero por agora as pintas irlandesas terán que agardar un pouco máis, e nós contentas de comezar esta experiencia e compartila con todas vós.
