As seccións de deportes de practicamente todos os xornais inzan as súas páxinas, moitas veces obrigados pola actualidade, outras por inercia, case sen querer, de informacións cunha alta carga negativa: abusos sexuais por parte de atletas ou dirixentes, competicións que se desenvolven en países onde os dereitos humanos teñen menos valor que unha sinal de ceda o paso ou escándalos de dopaxe ou corrupcións de toda pelaxe.
Non obstante, de forma paralela, pero como acontece sempre coas boas novas, facendo moito menos ruído, o mundo do deporte conta con cada vez máis probas, eventos ou certames de carácter solidario con todo tipo de causas e en practicamente todas as modalidades.
Unha das que máis destacadas neste sentido é o atletismo. A próxima semana debutará no calendario a I Carreira-Andaina Solidaria As Pontes Contigo, incluída no programa oficial da Federación Galega de Atletismo (FGA) e que terá lugar o 24 de setembro a partir das 10 horas nas Pontes de García Rodríguez. Os e as participantes percorrerán cinco quilómetros sobre asfalto, para o que pagarán entre tres e seis euros que irán destinados a colaborar con Xanela, unha asociacións que traballa con persoas con diversidade funcional. Ademais, a organización abriu unha fila cero para que, quen queira, poida contribuír a axudar as persoas "que sofren soidade, requiren de coidados paliativos ou dalgunha atención especial".
Sete días despois, o 1 de outubro, en Mosteiro-Meis, está programada a I Carreira Solidaria de Leo. Esta toma o seu nome dun neno falecido en novembro do pasado ano 2022 a causa dunha enfermidade rara, polo que a súa meta é "dar visibilidade, apoiar e recadar fondos que axuden a mellorar a calidade de vida de nenos e nenas que padecen este tipo de doenzas".
Alén do atletismo, o Partido Solidario Gadis -no que se doan cinco quilos de alimentos por cada punto anotado- xa é un clásico do Nadal Galego, tanto como o Torneo de Tenis de Mesa Pola Saúde Mental de Narón, que mañá mesmo alcanzará a súa décimo cuarta edición colaborando coa Federación Galega de Asociacións de Familiares e Persoas con Enfermidade Mental.
X Carreira da Auga a prol de Unicef
Un dos eventos deportivos solidarios máis especiais da Galiza é a Carreira da Auga a prol de Unicef, que organiza o Club Atletismo Sada e regresa despois de catro anos de ausencia.
O certame terá lugar o domingo 8 de outubro ás 10 horas no Paseo Marítimo da comarca coruñesa, e todos os fondos recadados coa inscrición -que se elevará até os tres euros para as crianzas e os seis no caso dos adultos- dirixiranse á antedita axencia das Nacións Unidas, que ten como misión garantir o benestar e o cumprimento dos dereitos da infancia e a adolescencia en todo o planeta.
O prazo para apuntarse na cita permanecerá aberto até o catro de outubro, e poderá realizarse a través do portal de Championchip Norte. Como en anteriores edicións -a última foi xusto antes da irrupción da pandemia da Covid-, haberá diferentes categorías para escoller: carreiras desde os 100 metros para os nenos e nenas, até os 10 quilómetros para as persoas adultas e as tradicionais andainas para quen queira colaborar dando un paseo solidario.
