A Boa Vila acollerá o vindeiro domingo, día 24 de marzo, un novo evento deportivo, esta vez coas bicicletas como grandes protagonistas. Trátase do Gran Premio Cidade de Pontevedra, que promete ofrecer quilómetros de competición a través dunha proba que forma parte do calendario da Copa de España Feminina en Estrada e que implica a distintas cidades do territorio estatal.
O certame presentará 40 equipos, entre os que destaca o local Team Farto-BTC, e alén da propia carreira contará con diversas actividades paralelas que acompañarán o seu desenvolvemento na cidade do Lérez, como obradoiros, exposicións de bicicletas de diferentes marcas, palestras e conferencias, xincanas para as crianzas no centro da cidade ou un menú especial en diferentes locais hostaleiros da localidade denominado Bike e aberto tanto a participantes como a seareiros e seareiras do ciclismo.
Durante o acto de presentación deste Gran Premio de Pontevedra, que tivo lugar na terza feira na Praza do Concello, o alcalde da Boa Vila, Miguel Anxo Fernández Lores, lembrou que o apoio institucional ao deporte feminino representa unha "obriga absoluta", máis aínda "cando se percibe o éxito que teñen este tipo de probas e como esta disciplina deportiva continúa a gañar adeptas".
Por outra parte, o rexedor puxo en valor o "auxe" que vive o ciclismo na cidade de Pontevedra, representado "na inxente cantidade de probas que se foron realizando, e que se realizarán, nos últimos tempos", incidindo no "bo estado de saúde" desta modalidade e na "capacidade da Boa Vila para atraer e fidelizar a todos e todas as participantes destas probas".
III Challenge Volta ao Barbanza 'A Orixe'
Sen deixar o deporte das dúas rodas, a terceira edición da Challenge Volta ao Barbanza 'A Orixe', que de novo está organizada polo Club Ciclista homónimo, disputarase do sábado 23 de marzo ao domingo 24.
A competición, de categoría júnior e puntuábel para o ránking da Federación Española de Ciclismo, contará cun total de 180 quilómetros divididos en dúas etapas, tendo lugar a primeira no municipio de Boiro e a segunda no da Pobra, e entre os favoritos destaca o gañador do ano pasado, Sergio Calvo.