Un dos culebróns do verán chega ao seu último episodio. Despois de ser vinculado inicialmente co Valencia, o extremo Carles Pérez finalmente chegará ao Celta de Vigo en calidade de cedido procedente da Roma. Cousas dos tempos nos que vivimos, a parella do xogador confirmou o segredo a voces a través dun vídeo publicado na súa conta de TikTok antes incluso de que o fixesen os propios clubs.
Nado en Granollers en 1998, este canteirán do Fútbol Club Barcelona non logrou facerse cun oco no sempre competitivo ataque blaugrana e decidiu probar sorte no fútbol italiano, concretamente na Roma.
Foi en xaneiro de 2020 cando fixo as maletas, pero no Calcio tampouco foi quen de demostrar todas as capacidades baixo a dirección de José Mourinho. O portugués non contou demasiado con el, pois tan só disputou 993 minutos repartidos entre a Liga, a Copa de Italia e a Conference League. Con todo, en máis dunha ocasión gabou a entrega e o traballo dun home que medrou como futbolista nos dous anos e medio que leva na Roma, especialmente no eido físico.
A Vigo chega en calidade de cedido, ampliando así a conta de reforzos de verán do conxunto olívico até os oito, tras Williot Swedberg, Óscar Rodríguez, Luca de la Torre, Agustín Marchesín, Unai Núñez, Mingueza e Gonçalo Paciencia.
Xunto con este último, contribuirá a reducir unha Aspasdependencia na liña de ataque moi evidenciada no que vai de pretempada. Ademais, Carles Pérez reunirase en Vigo con Mingueza, un vello coñecido das categorías inferiores do Barça.
O central lembrou nunha rolda de prensa no día de onte a "boa relación" que mantiñan na súa xuventude, e tras afirmar que o dianteiro "ten características para achegar moito", confesou que o dianteiro "tiña gañas" de xogar no Celta.
Quen ten todo para saír da escuadra olívica é Santi Mina. Tanto fontes do club como próximas ao futbolista, condenado por abuso sexual o pasado mes de maio, recoñecen unha interesante proposta do Al Shahab saudita, que estaría disposto a facerse cargo integramente do salario do xogador durante unha cesión dun ano.
