O Pazo dos Deportes de Riazor acollerá este domingo, 12 de novembro, a edición número 27 dos Xogos de Baloncesto para persoas con discapacidade intelectual, máis coñecidos como os Special Olympics Galiza.
'O deporte é para todos e todas', unha mensaxe que a base de esforzo e insistencia de todos os axentes implicados -Administracións Públicas, empresas privadas, clubs, deportistas, medios de comunicación...- continúa callando pouco a pouco en forma dun maior número de eventos protagonizados por persoas con diversidade funcional e nunha maior atención por parte do gran público e da prensa.
Neste eido, un dos certames máis veteranos do panorama galego é o Special Olympics Galiza, que regresa para desenvolver a súa vixésimo sétima edición esta fin de semana reunindo na cidade herculina, A Coruña, un total de 16 asociacións de toda a Galiza que comezarán a xornada do domingo ás 10.45 horas da mañá desfilando no Pazo dos Deportes, seguindo o cerimonial típico dos Xogos Olímpicos.
Posteriormente, un ou unha deportista da Asociación pro Persoas con Discapacidade Intelectual da Galiza (Aspronaga) lerá o lema dunha competición na que serán da partida 233 atletas: "Quero gañar, mais se non o consigo, deixádeme ser valente no intento".
Durante o transcurso das actividades, os e as participantes terán a oportunidade de votar a aquela entidade cuxos deportistas destacasen pola súa deportividade ao longo do transcurso do día, recibindo a gañadora o Premio ás Boas Prácticas do Special Olympics Galiza.
A presentación desta cita xa clásica no calendario do deporte adaptado produciuse na xornada de onte no Pazo de María Pita, onde se congregaron o concelleiro da Área de Fomento e Promoción, Gonzalo Castro -que puxo en valor a "relevancia do deporte e os seus valores para promover a inclusión social"-; o seu homólogo de Deportes, Manuel Vázquez; o presidente de Special Olympics Galiza, Eladio Fernández; o deputado provincial Antonio Leira; o presidente de Aspronaga, Nicanor Álvarez, e tres deportistas da asociación coruñesa: Sergio Barbeito, Eloy Nogueira e Roland Bitureira.
